Яке аз бонкҳои тиҷоратии дучори мушкилоти Тоҷикистон - «Тоҷпромбонк» - ба ҳисоббаробарӣ бо муштариёни худ шитоб надорад. Ҳарчанд аввали сол давлат ба бонк барои ҳисобаробарӣ бо мизоҷон маблағ ҷудо карда бошад ҳам, саҳҳомони бонк шикоят мекунанд, ки то ҳол пулҳои худро бозпас гирифта наметавонанд.

Саҳҳомони «Тоҷпромбонк» мегӯянд, аз ҳамарӯза ба саридораи бонк рафтан, ки аз он ҳеҷ натиҷае ҳосил намешавад, хаста шуда, ҳама маблағи равуо беҳуда сарф мешаваду ҳам аз нигоҳи равониву ҷисмонӣ онҳо зиён мебинанд.

Муштариёни бонк эътироф мекунанд, ки замони фаъолияти маъмурияти муваққатӣ як каме маблағ мегирифтанд, вале баъди ба ихтиёри роҳбарони пешин супурдани он аз нимаи моҳи декабри соли гузашта, саҳҳмонро танҳо бо ваъда «сер мекунанд».

Дар мусоҳиба ба «Азия-Плюс» Малоҳат Собирова, яке аз саҳҳомони бонк изҳор кард, ки онҳо танҳо маблағҳои худро бозпас гирифтанианд ва аз ин «масхарабозиҳои беохири»-и раҳбарияти бонк сар аз Бонки миллӣ то Дастгоҳи президент шикоят бурда, валеҳеҷ посухе нагифтаанд.

Маъюби гурӯҳи якум Мирзохӯҷа Самадов ба «Азия-Плюс» изҳор намуд, ки баъди аз бонк талаб кардани фоизҳои муқарраршуда аз рӯи амонат ӯро латукӯб кардаанд.

«Муддати 4 моҳи ахир ман фоизҳои бароям муқарраршударо гирифта наметавонам ва барои гурусна намондан, қарз гирифта, акнун қарздиҳандагон маро ором намегузоранд, вале ман маблағе надорам, ки қарзҳои онҳоро баргардонам», - гуфт ин мард.

Ӯ зикр кард, ки охири моҳи январ сабру тоқатро аз даст дода, ба кабинети муовини раиси бонк Маҳмадулло Мирзоев даромадааст.

«Мирзоев посбонҳоро фарёд карда, онҳоро маро дағалона аз кабинет берун ва латукӯб карданд, - мегӯяд маъюб - Баъдан Мирзоев супориш дод, ки маро аз зинапояҳои ошёнаи дуюм поин кунанд, вале пас аз ин албатта, барои розиву ба милитсия муроҷиат накарданам, аз маблағи муқарраршуда 100 доллар доданд, то ки хомӯш бошам».

Дар ҳамин ҳол, чанде аз муштариёни бонк изҳор мекунанд, ки маблағи пулӣ дода мешавад, вале танҳо ба шиносҳои раҳбарияти бонк.

Аз муроҷиатҳои сершумори «Азия-Плюс» ба «Тоҷпромбонк» дар мавриди рӯшанӣ андохтан ба ин масъала ҳеҷ натиҷа ҳосил нашуд: раҳбарияти бонк гоҳе машғул асту гоҳи дигар дар кабинеташ ҳузур надорад.

Ба дархости гуфтугӯ бо дигар шахсони масъул дар қабулгоҳи бонк посух доданд, ки бо рӯзноманигорон танҳо муовини раиси Бонк Ҷумъа Қаюмович суҳбат карда метавонад, ки айни замон дар рухсатӣ аст. Мизоҷони бонк бошанд, мегӯянд, ки Ҷумъа Эшовро раҳбарияти бонк ҳанӯз моҳи январи ҳамин сол аз вазифааш озод кардааст.

Тавре дар сомонаи бонк ишора мешавад, муассисони «Тоҷпромбонк» корхонаҳои ғайридавлатии тиҷоратии Тоҷикистон ва шахсони воқеӣ мебошанд. Сад фоиз сармояи оинномавии бонк сармояи ғайридавлатӣ буда, 5,5 фоизи сармояи оинномавии бонк ба гайрирезиденти кишвар, шаҳрванди Британияи Кабир тааллуқ дорад.