Бо мақсади боздид аз раванди фаъолияти истеҳсолии корхонаи  ҶДММ «Пакрут» Вазири саноат ва технологияҳои нави Тоҷикистон Заробиддин Файзуллозода ва муовини якуми вазир Шарифӣ Бахтиёр Маҳмуд  ба корхонаи мазкур ташриф оварданд.

Бино ба иттилои дафтари матбуоти Вазорат, дар рафти шиносоӣ бо корҳо аз минтақаҳои кории корхона, аз ҷумла аз кони маъдани Пакрут, фабрикаи бойгардонӣ, полоишгоҳи Луфиғар, сехи пуркунандаи фазои коркардшудаи кони маъдан, бошишгоҳи кории Пакрут ва заводи гидрометаллургии Ваҳдат боздид шуд.

Гуфта мешавад, ҳангоми шиносоӣ бо рафти корҳо дар истеҳсолот вазир ба камбудиву норасоиҳои мавҷуда ишора намуда, ҷиҳати бартарафсозии он ба Чжан Ган менеҷери генералии корхонаи “Пакрут” дастуру супоришҳо дода, пас аз боздиди минтақаҳои корӣ бо иштироки роҳбарият ва кормандони муҳандисӣ – техникии корхона машварати корӣ баргузор гардид.

Қайд гардид, ки роҳбарияти корхона пеш аз ҳама корҳои истеҳсолиро танҳо дар асоси лоиҳаҳои тасдиқгардида ва тибқи талаботи қонунгузории Тоҷикистон ба роҳ монда, ҷиҳати зиёд намудани ҳаҷми истеҳсоли маҳсулот, воридоти технологияҳои нав, зиёд намудани ҷойҳои нави корӣ ва хусусан гузоштани саҳм дар раванди расидан ба ҳадафи 4-уми миллӣ, яъне “Саноатикунонии босуръати кишвар” чораҳои судманд ва саривақтӣ андешанд.

Ҳамзамон аз ҷониби Заробиддин Файзуллозода масъалаи  бо забони давлатии тоҷикӣ, русӣ ва хитоӣ  ба роҳ мондани ҳуҷҷатгузорӣ ва лоиҳаҳои кории корхона мавриди таъкид сурат гирифта, ба масъалаҳои иҷтимоии кормандон, риояи техникаҳои бехатарӣ, риояи одоби меҳнат ва муносибати дурусту якдигарфаҳмии байни кормандон, инчунин пешгирии ҳолатҳои садамавӣ диққати махсус дода, барои риояи онҳо ба масъулини корхона супоришҳои мушаххас дода шуд.

Зикр мегардад, ки инчунин ба роҳбарияти корхона барои зиёд намудани ҳаҷми истеҳсоли маҳсулот ва аз 660 ҳазор тонна ба 1 млн. 320 ҳазор тонна  дар як сол расонидани коркарди маъдан дастуру супоришҳои мушаххас дода шуд.

Қобили зикр аст, ки бастаи пурраи саҳмияҳои ҶДММ “Пакрут” аз соли 2014 ба корпоратсияи China Nonferrous Metal International Mining Co., Ltd.-и Чин тааллуқ дорад.

Доир ба истеҳсоли сиккаҳои нахустини тилло аз маъдани истихроҷшуда дар кони “Пакрут” корпоратсияи чинӣ аввали соли 2017 хабар дода, аввалин намунаҳои тиллои покшуда тирамоҳи соли 2015 ба даст оварда шуда буд, ки бо мақсади озмоиши таҷҳизот сурат гирифта буд.

Соли 2017 кони тиллои “Пакрут” аз тармафароӣ зарар дида, ба дастгоҳу таҷҳизоти корхона зиёни назаррас расид, ки ба боздошти фаъолияти он боис гардид.

Ҷараёни истеҳсолот дар коргоҳи ғанисозӣ танҳо семоҳаи дуюми соли гузашта барқарор шуда, 1 июл корхонаи маъдангудозӣ сиккаҳои тилло исеҳсол намуд.

Соли сипаришуда корпоратсияи CNG изҳор намуд, ки барои беҳбуди коркарди кон иловагӣ 70 млн. доллар маблағгузорӣ кардааст. То ин дам ширкат барои коркарди кон беш аз 180 млн. доллар сармоягузорӣ равона карда буд.

Муҳлати иҷозатномаи гирифтаи CNG ба коркарди кони “Пакрут” соли 2030 ба итмом мерасад. То он замон ширкати Чин ният дорад, ки аз ин кон 857 ҳазор унсия (воҳиди вазн, ки ба 29,86 гр. баробар аст) тилло ва 123 ҳазор унсия нуқра ба даст орад.

Ба сурати умум дар Тоҷикистон зиёда аз 10 корхона ба истеҳсоли металлҳои қиматбаҳо машғуланд, ки бузургтарини онҳо дар баробари КМ «Зарафшон», КМ «Апрелевка», корхонаи давлатии «Тиллои тоҷик», корхонаи заршӯйӣ (артел)-и «Одина» ва ширкати «Пакрут» мебошанд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.