Мақомоти гумруки Ӯзбекистон бо сабабҳои ҳоло номаълум аз 5-6 ноябри соли равон барои анҷоми расмиёти гумрукии ҳар як тонна семент аз Тоҷикистон 300 доллар талаб мекунанд. Дар ин бора ба “Азия-Плюс” як манбаи огаҳи машғул ба интиқоли ин маҳсулот хабар дод.

Ба гуфтаи ӯ, то ин дам ин маблағ 35 долларро ташкил медод.

Ӯ бар ин назар аст, ки боло бурдани маблағи пардохтҳои гумрукӣ бо маслиҳати корхонаҳои истеҳсоли сементи Ӯзбекистон сурат гирифтааст.

“Тибқи маълумоти расида, рӯзи 16 октябр дар Самарқанд бо иштироки намояндагони баъзе корхонаҳои истеҳсоли семент, ки сармоягузоронашон асосан шаҳрвандони Чин мебошанд, маҷлис баргузор шудааст. Дар маҷлис масоили марбут ба рушди соҳаи истеҳсоли семент дар Ӯзбекистон, нархгузорӣ ба ин масолеҳи сохтмон, инчунин созиш (маслиҳат) байни истеҳсолкунандагони семент дар ин кишвар баррасӣ шудааст”, - гуфт ҳамсуҳбати “Азия-Плюс”.

Ӯ зикр кард, ки Тоҷикистон интиқолдиҳандаи асосии семент ба Ӯзбекистон аст. Талаботи солонаи воридоти семент ба ин кишвар 2,2 млн тонна арзёбӣ мешавад.

Сурат: Asia-Plus
Мувофиқи маълумоти оморӣ, давоми моҳҳои январ-сентябри соли равон Тоҷикистон ба маблағи умумии 21 млн доллар ҳудуди 532 ҳазор тонна семент содир кардааст, ки 250 ҳазор тонна (7,8 млн доллар) камтар нисбат ба ҳамин давраи соли 2023 мебошад.

Зиёда аз 300 ҳазор тонна (57% аз ҳаҷми умумӣ) семент ба Афғонистон ва беш аз 230 ҳазор тонна (43%) - ба Ӯзбекистон интиқол дода шудааст.

Манбаъ таъкид дошт, ки айни замон дар қаламрави Ӯзбекистон 30 корхонаи истеҳсоли семент фаъолият дошта, сохтмон ва таъмиру навсозии чандин иқтидори дигар идома дорад, ки пас аз мавриди истифода қарор гирифтани онҳо, манъи воридоти ин маҳсулот аз эҳтимол дур нест.

Ёдрас мекунем, ки соли 2020 низ ҳукумати Ӯзбекистон бо қарори худ воридоти сементро аз 1 май то охири ҳамон сол боздошта буд. Аммо баъди се ҳафта бо қарори дигари худ аз 23 май ин маҳдудиятро бекор кард.

Қобили зикр аст, ки семент яке аз маҳсулоти асосии содиротии Тоҷикистон ба шумор меравад.

Тоҷикистон аз соли 2018 аз рӯи ҳаҷми гардиши моли хориҷии Ӯзбекистон дар мақоми 5-ум қарор дорад. Интиқоли молу маҳсулоти Ӯзбекистон ба Тоҷикистон тайи 6 соли ахир аз 132 млн доллар дар соли 2018 то ба 353,4 млн доллар дар соли 2023 зиёд шудааст.

Дар Telegram, Facebook ва Instagram бо мо бимонед.