Душанбе. 18-уми июн. ОИ «Азия-Плюс» - Маросими дафни собиқ вазири умури дохилии ҶТ Маҳмадназар Солеҳов, ки шоми дирӯз даст ба худкушӣ зад, дар зодгоҳаш – Сарбанд ба хок супурда хоҳад шуд. Соати 4-и субҳи имрӯз ҷасади ӯро ба Сарбанд бурданд.

Ёдрас мекунем, ки М.Солеҳов ба ҳайси вазири умури дохилии ҶТ ду сол фаъолият карда, моҳи январи соли 2009 аз мансаб сабукдӯш гардида буд. Қобили зикр аст, ки чанд рӯзи ахир дар додгоҳи шаҳри Душанбе баргузории мурофиаи додгоҳии бародари собиқ вазир – Тағойназар Солеҳов идома дорад. Т.Солеҳов дар куштор ва нигаҳдории ғайриқонунии силоҳ гунаҳкор дониста мешавад.

Муҳаммадназар Солеҳов тӯли чандин сол дар мақомоти додситони кулли Тоҷикистон, раиси Додгоҳи қонуни асосӣ, муовини вазири корҳои дохилӣ, вазири умури дохилӣ ва ду навбат раҳбари дастгоҳи иҷрояи президенти тоҷикистон ифои вазифа намудааст.