Душанбе. 6-уми июл. ОИ «Азия-Плюс» - Ахиран ҳодисаҳои ба ҳалокат расидани шаҳрвандон дар натиҷаи риоя накардани қоидаҳои бехатарӣ ҳангоми муносибат бо таҷҳизоту дастгоҳ ва ноқилҳои хати нерӯи барқ зиёд мешавад.

            Чӣ тавре ки ба ОИ «Азия-Плюс» аз ВКД ҶТ иттилоъ доданд, рӯзи 4-уми июл дар ноҳияи Фархор наврас Шамсиддин Пиров сими дар замин хобидаи хати интиқоли барқро бардоштанӣ шуда, аз зарбаи шиддати барқ ба ҳалокат мерасад. «Рӯзи 5-уми июл дар ноҳияи Носири Хисрав Мирсаид Лолаеви 25-сола ҳангоми чаронидани чорво телефони мобилиро ба сими хати интиқоли барқ пайваст карданӣ шуда, ӯ низ аз зарбаи нерӯи барқ ба ҳалокат мерасад», - гуфт манбаъ.

            Бино ба иттилои манбаъ, дар ноҳияи Восеъ низ наврас Муродов Сӯҳроб ба болои панҷараи назди хонаашон баромада, тасодуфан ҷисмаш ба сими барқ мерасад ва аз зарбаи он ҳалок мешавад. «Ҳамчунин рӯзи 5-уми июл дар ноҳияи Спитамен ноболиғ Холмирзоев Ғолиб ба симчӯби баландиаш 18 метр баромада, бо сабабҳои номаълум аз он ба замин меафтад ва аз ҷароҳатҳои бардошта дар роҳи интиқол ба беморхона ба ҳалокат расидааст», - афзуданд дар ВКД ҶТ.