Дар Душанбе бо иштироки писари мансабдори баландпояи давлатӣ садамаи нақлиёти навбатӣ рух дод.

Тавре ба ОИ «Азия-Плюс» аз мақомоти ҳифзи ҳуқуқи ҷумҳурӣ иттилоъ доданд,  садама соати 8-и шоми рӯзи 14-уми август дар мавзеи буриши кӯчаҳои Шестопалов-Қарабоев, дар рӯ ба рӯи бинои шуъбаи раводид ва бақайдгирии пойтахт ба вуқӯъ пайвастааст.

«Автомашинаи тамғаи «Опел-Астра» таҳти идораи Неъматулло Раҳматови 55-сола ва автомашинаи тамғаи «Лексус»-и муталлиқ ба Ораз Раҳматуллоеви 30-сола бо ҳам бархӯрданд», - гуфт манбаъ.

Таври маълум, ахирӣ писари мушовири давлатии президенти Тоҷикистон оид ба сиёсёати хориҷӣ Эркин Раҳматуллоев аст.

Зикр гардид, ки бар асари садама ронандаи автомашинаи «Опел» ҷароҳатҳои вазнин бардошта, баъди гузашти чанд муддате дар шифохона ба ҳалокат расидааст.

«Аз рӯйи ин далел тафтишот идома дошта, гунаҳкори садама пас аз баргузории ташхис муайян карда хоҳад шуд», - афзуд манбаъ.