Тафтиши ҳодисаи садамаи нақлиёте, ки субҳи рӯзи 23-юми декабр дар маркази шаҳри Душанбе рух дода, бар асари он бародарон – дугоникҳо Амир ва Тимур Пешковҳо (Ғуломовҳо) ва ҳамчунин дӯсти онҳо Ориён Ҷӯраев ба ҳалокат расида буданд, тӯл мекашад.

Сардори маркази матбуоти Шуъбаи БДА-и Раёсати ВКД ҶТ дар шаҳри Душанбе ба ОИ «Азия-Плюс» дар ин робита хабар дод, ки сабаби тӯл кашидани ҷараёни тафтишот бемории сокини 23-солаи пойтахт Назар Дериникян аст, ки он замон автомашинаи тамғаи «Лендровер» таҳти идораи ӯ қарор дошт.

«Н. Дериникян ҳоло пурра ба ҳуш наомада, вазъи имрӯзаи ӯ имкон намедиҳад, ки муфаттишон ҷузъиёти садамаро аз ӯ ҷӯё шаванд», - зикр кард Латифов.

Ёдрас мекунем, ки субҳи рӯзи 23-юми декабри соли сипаришуда ронандаи автомашинаи тамғаи «Лендровер», хатмкардаи аспирантураи Донишгоҳи давлатии Маскав, сокини 23-солаи пойтахт Назар Дериникян ҳангоми ҳаракат дар майдони Дӯстии хиёбони Рӯдакӣ аз уҳдаи идораи воситаи нақлиёт набаромада, бо суръати баланд ба бинои Почтаи марказии Душанбе (Главпочтамт) бархӯрд.

Бар асари бархӯрд таркиш ба вуқӯъ пайваста, дар ҷойи ҳодиса се нафар мусофирони «Лендровер» - Амир ва Темур Пешковҳои 24-сола ва ҳамсояву дӯсти онҳо Ориён Ҷӯраев ба ҳалокат расиданд. Ронанда бо ҷароҳатҳои зиёди ҷисмонӣ ба бемористон мунтақил шуда буд.