Дар ин бора Имомалӣ Иброҳимзода, муовини раиси Кумитаи ҳолатҳои фавқулода ва мудофиаи гражданӣ имрӯз, 7-уми феврал, дар нишасти хабарӣ иттилоъ дод.

Субҳи имрӯз аз ин ниҳод ба “Азия-Плюс” гуфта буданд, ки барои фиристодани наҷотдиҳандагони тоҷик ба Туркия ҷиҳати рафъи оқибатҳои заминларзаи шадид дар Вазорати корҳои хориҷӣ бо супориши раисиҷумҳури кишвар Эмомалӣ Раҳмон ҷаласа ҷараён дорад.

Ҳоло оид ба натиҷаи ҷаласаи мазкур маълумоти муфассал дастрас нест.

Дар ҳамин ҳол кишварҳои Осиёи Марказӣ наҷотдиҳандагони худро аллакай ба Туркия фиристоданд.

Аз ҷумла, субҳи имрӯз бо супориши президенти Қазоқистон наҷотбахшони ин кишвар ба Туркия сафар карданд.

Ҳамчунин, 63 нафар наҷотдиҳандагони Қирғизистон низ имрӯз ба Туркия сафар карданд.

Ӯзбекистон ҳам ҳадаф дорад, ки 60 нафар наҷотдиҳандаи худро ба Туркия фиристад.

Гуфтан ба маврид аст, ки субҳи 6-уми феврал, заминларзаи шадид бо шиддати 7.8 балл манотиқи ҷанубу шарқи Туркия ва шимоли Сурияро такон дод. Баъд аз зӯҳри ҳамон рӯз заминларзаи дигаре бо шиддати 7.5 бал рух дод, ки омори қурбониёнро беш аз ҳадд боло бурд.

То ҳол теъдоди қурбониён беш аз 3 ҳазор гуфта мешавад, аммо он ҳар лаҳза афзоиш меёбад.

Дар Telegram, Facebook, Instagram бо мо бимонед.