Душанбе. 16-уми июл. ОИ «Азия-Плюс» - Кормандони Раёсати Агентии назорати давлатии молиявӣ ва мубориза бо коррупсияи назди президенти ҶТ дар вилояти Хатлон зимни санҷиши фаъолияти Ҷамъмяти саҳомии шакли кушоди (ҶСШК) «Пахтаи Кӯлоб» исрофкории аз ҳад зиёд ва изофанависии кормандони масъули онро ошкор сохтанд.

Роҳбари дафтари матбуоти агентӣ Шарифбек Шарифов иттилоъ дод, ки ҳангоми баргузории тафтишот кормандони агентӣ дар тӯли солҳои 2005-2007 изофанависии қабули пахтаи вуҷуднадоштаро аз хоҷагиҳои пахтакор ошкор сохтаанд, ки ба ин амал мудири анбор Нурмуҳаммад Одинаев ва молшиносон Ҳабибулло Мирзоев ва Искандар Гиёев гумонбар дониста мешаванд. Аз ин амали онҳо ба давлат дар ҳаҷми 1 млн. 195 ҳазору 905 сомонӣ хисорот ворид гардидааст.

Ба иттилои манбаъ, зимни баррасии парвандаи ҷиноии оғозгардида, ба буҷаи давлат 55 ҳазор сомонӣ аз ин маблағ баргардонида шудааст.

«Нисбат ба ин далел парвандаи ҷиноӣ оғоз гардида, тафтишот идома дорад», - афзуд Ш.Шарифов.