Бо мақсади бо таҷҳизоти муҳандисӣ таъмин намудани марзи давлатӣ, Хадамоти марзбонии Қирғизистон дар масофаи беш аз 16 километру 340 метри марзи давлатӣ бо Тоҷикистону Қирғизистон панҷараҳо насб намуд.

Бино ба маълумоти Хадамоти давлатии марзбонӣ ва ВАО-и Қирғизистон, қад-қади марзи давлатӣ хандақҳо кофта шуданд, ки масофаи умумиашон зиёда аз 8 километрро ташкил медиҳад.

Зикр мегардад, ки имрӯз низ корҳои бо таҷҳизоти муҳандисӣ таъмин кардани марзи давлатии Қирғизистон идома дорад. «Барои ҳифзи пурсамаи марз ва мушоҳидаву назорати визуалии он посгоҳҳо гузошта хоҳанд шуд, ки ба таъмини ҳимоя ва назорати ҳудуди 500 километри марзи байни Қирғизистон бо Тоҷикистону Ӯзбекистон имкон медиҳанд», - хабар дода мешавад дар иттилоъ.

Гуфта мешавад, посгоҳҳои мушоҳидаву назорат дар қисматҳои бештар имконпазири ба вуқӯъ пайвастани ҳодисаҳои убури ғайриқонунии марзи давлатӣ гузошта шуда, онҳо бо тамоми таҷҳизоту дастгоҳи муосири мушоҳидаи визуалӣ таъмин карда хоҳанд шуд.

Ҳамчунин бо мақсади тақвияти посбонӣ ва ҳимояи марзи давлатии Қирғизистон, мубориза бо ҳодисаҳои коррупсионӣ дар гузаргоҳҳои назоратии марз низоми мушоҳидаи видеоии муҷаҳҳаз бо технологияи такмилёфта ва имкони дастрасӣ аз масофаи хеле дур ба камераҳои видеоӣ низ насб карда мешавад.