Ёвари президенти Тоҷикистон оид ба масоили амнияти миллӣ Шералӣ Хайруллоев имрӯз дар шаҳри Исфара бо аҳолии деҳаи Хоҷаи Аъло ва ҷамоати Ворухи ҳаммарз бо Қирғизистон мулоқот кард.

Тавре ба ОИ «Азия-Плюс» як манбаъ аз ҳукумати вилояти Суғд хабар дод, дар мулоқот бо сокинони ҷамоати Ворух масоили асосӣ ба мушкилоти аз ҷазирақаламрав (анклав) берун овардани ҷамоат марбут будаанд.

Ба иттилои манбаъ, Шералӣ Хайруллоев зикр кардааст, ки оид ба ҳалли ин масъала Тоҷикистон роҳу воситаҳои худро пешниҳод намуда, посухи Қирғизистонро интизор аст.

Ёвари президенти Тоҷикистон оид ба масоили амнияти миллӣ марҳилаи ахири гуфтушунидҳои ҳукумати Тоҷикистону Қирғизистон оид таъин ва аломатгузорӣ дар қитъаҳои баҳсноки марзи давлатиро, ки рӯзи 3-юми март дар Душанбе доир гардиданд, умедворкунанда арзёбӣ карда, қайд кардааст, ки марҳилаи навбатии гуфтушунидҳо пас аз 15-уми март сурат мегиранд.