Дар доираи мавриди амал қарор гирифтани Қонуни ҶТ «Дар бораи афв» аз 24-уми октябри соли равон аз 5 муасисаи ислоҳии вилояти Суғд 726 нафар озод шуданд.

Тавре ба «Азия-Плюс» сарёвари прокурори вилоят Ортиқбой Мирзоев хабар дод, аз муассисаи ислоҳии низомаш шадид 64 нафар маҳкумшудагон, аз муассисаи ислоҳии реҷаи пурзӯр 42 нафар, аз муассисаи ислоҳии сукунат 483 нафар, аз тавқифгоҳи муваққатӣ (СИЗО)-и шаҳри Хуҷанд 46 нафар ва аз муассисаи ислоҳии шаҳри Истаравшан 91 нафар озод карда шудаанд.

Аз шумори умумии аз муассисаҳои ислоҳӣ озодшуда 710 нафар сокинони вилояти Суғд, 6 нафар сокини вилояти Хатлон, ду нафар аз ВМКБ, се нафар аз шаҳри Душанбе, як нафар аз ноҳияҳои тобеи марказ ва чор нафарашон шаҳрвандони хориҷӣ мебошанд.

Дар ҳамин ҳол, тавре хабар дода будем, як нафари афвшуда аллакай даст ба ҷиноят зад.  Аввали ҳафтаи равон сокини 31-солаи ҷамоати Дар-Дари ноҳияи Айнӣ Табур Ғафуров зимни муноқиша бо падари 55-солааш ӯро бо як чӯбе ба сараш мезанад, ки бар асари ин зарба мард ҷароҳат бардошта, дар ҷойи ҳодиса ба ҳалокат расид.