Президенти Украина Виктор Янукович сарвари давлати Тоҷикистон Эмомалӣ Раҳмонро ба бозии финалии Ҷоми Аврупо-2012 оид ба футбол, ки дар варзишгоҳи Маҷмааи миллии варзишии «Олимпийский» дар пойтахти Украина – шаҳри Киев доир мегардад, даъват намуд.

Бино ба иттилои хадамоти матбуоти сарвари давлати Украина, дар чаҳорчӯби сафари расмии президенти Тоҷикистон ба Украина сарони кишварҳои Украинаву Тоҷикистон аз варзишгоҳи таҷдидёфтаи «Олимпийский» боздид кардаанд.

Дар иттилоъ зикр мегардад, ки Янукович ҳамчунин ба Эмомалӣ Раҳмон тӯби футбол бо тасвири варзишгоҳи «Олимпийский»-ро низ тақдим намудааст.

Ёдрас мекунем, ки мусобиқоти Ҷоми Аврупо-2012 оид ба футбол дар Украинаву Лаҳистон баргузор мешавад. Мусобиқот 8-уми июн бо вохӯрии нахустин дар пойтахти Лаҳистон – шаҳри Варшава оғоз гардида, бозии ниҳоӣ рӯзи 1-уми июл дар шаҳри Киев доир мегардад.