Аз 22 то 24 декабри соли 2011 ташрифи профессор Лим Кок Винг, Президенти Донишгоҳи «Лимкоквинг»-и Малайзия ба Душанбе баргузор гардид. Тибқи барномаи сафари худ, профессор Лим Кок Винг бо Муовини Сарвазир Руқия Қурбонова, Муовини Вазири корҳои хориҷӣ, Вазири маориф ва бо Вазири рушди иқтисод ва савдои Ҷумҳурии Тоҷикистон вохурӣ анҷом дод.

Тавре аз департаменти иттилооти Вазорати умури хориҷии ҷумҳурӣ хабар доданд, зимни мулоқотҳо ҷонибҳо вазъи кунунӣ ва дурнамои муносибатҳои мутақобилан судманди ду кишвари дӯст, хусусан дар соҳаи маориф имкони кушодани филиали Донишгоҳи «Лимкоквинг» дар Тоҷикистонро мавриди баррасӣ қарор доданд.

Ёдрас мекунем, ки Донишгоҳи «Лимкоквинг» (Limkokwing)-и Малайзия – Донишгоҳи Технологияҳои Креативӣ донишгоҳи байнулмилалиест, ки дар шаҳри Куала-Лумпур воқеъ аст. Дар он зиёда аз 6500 нафар донишҷӯён аз 90 кишвари дунё – Осиё, Африқову Аврупо (Малайзия, Ҳиндустон, Чин, Сингапур, Камбоҷа, Ботсвана, Британияи Кабир) таҳсили илм мекунанд.