ҶСП «Олим-Текстайлз» оид ба коркарди нахи пахта воқеъ дар ноҳияи Мастчоҳи вилояти Суғд ният дорад, ки шаҳраки истиқоматии худ бо тамоми зерсохторашро бунёд намояд.

Директори генералии корхона Валихон Набиев мегӯяд, шаҳрак дар назди корхона бунёд гардида, он аз коттеҷҳои замонавӣ ва биноҳои баландошёнаи истиқоматӣ барои коргарон иборат хоҳад буд. Ҳамчунин ба мисли дигар маҳаллаҳои аҳолинишин дар он мағоза, мактаб, кӯдакистон ва дигар иншооти зерсохтории зарурӣ бунёд мегарданд.

«Барои сохтмони шаҳрак то ҳанӯз замин ҷудо нашудааст, вале мо ба мақомоти раҳбарии ноҳияи Мастчоҳ ба таври хаттӣ дар ин хусус муроҷиат намудем ва акнун посухашро интизорем. Агар ҳама корҳо хуб шаванд, шаҳракро аз ҳисоби воситаҳои худӣ бунёд хоҳем намуд», - таъкид кард ӯ.

Ба қавли директори генералии корхона, айни замон дар корхона нахи пахта мутобиқи меъёрҳои аврупоӣ истеҳсол мешавад. «Дар се баст дар корхона 465 нафар фаъолият дошта, музди меҳнаташон ба ҳисоби миёна 250 доллари ИМА-ро ташкил медиҳад», - иброз дошт В.Набиев.

Соли равон дар корхона беш аз 683 тонна пахта коркард гардид. Танҳо дар соли 2011 корхона ба сифати андоз ба буҷети маҳаллӣ зиёда аз 220 ҳазор доллари ИМА маблағ пардохт кард.

Қобили зикр аст, ки ҶСП «Олим-Текстайлз» дар шаҳраки Такелии ноҳияи Мастчоҳ моҳи марти соли 2010 бо иштироки сарвари давлат Эмомалӣ Раҳмон мавриди баҳрабардорӣ қарор гирифта буд. Панҷ сол қабл зимни сафараш ба ин ноҳия президенти Тоҷикистон супориш дода буд, ки дар ин ҷо як корхонаи коркарди нахи пахта бо иқтидори 5 ҳазор тонна дар як сол сохта шавад.