Чанде қабл дар шаҳри Хуҷанд маросими гузоштани хишти аввал ба сохтмони бинои кӯдакистони нав дар қисмати соҳили чапи шаҳр баргузор шуд, ки тайи 20 соли ахир нахустин бинои кӯдакистони нав хоҳад шуд.

Тавре ба ОИ «Азия-Плюс» аз ҳукумати шаҳри Хуҷанд хабар доданд, кӯдакистон барои 250 нафар тарбиятгирандагон пешбинӣ шуда, аз маблағҳои буҷети шаҳрӣ ва қисман аз буҷети вилоят бунёд мегардад. Арзиши лоиҳавии сохтмон 15-16 млн. сомониро ташкил медиҳад.

 «Бинои кӯдакистон аз ду ошёна иборат буда, дар қаламрави он майдончаи варзишӣ, ҳавзи шиноварӣ ва боғ сохта мешавад. Кӯдакистон марҳила ба марҳила бунёд гардида, муҳлати мушаххаси ба истифода додани он маълум нест», - гуфт як манбаъ аз ҳукумати шаҳр.

Бино ба гуфтаи методисти шуъбаи таълими томактабии шуъбаи маорифи шаҳри Хуҷанд Туҳфа Мамадҷонова, айни замон дар шаҳри Хуҷанд 31 кӯдакистони давлатӣ ва як кӯдакистони хусусӣ амал мекунад, ки дар он кӯдакони синнусоли аз 18-моҳа то 7-сола тарбият мегиранд.