Беш аз як ҳазор нусха дастури омӯзишии «Таърихи Русия» барои муҳоҷирони кории тоҷик ба Русия фиристода шуд, ки муаллифаш Зафар Сайидзода, номзади улуми фалсафа, сармушовири дастгоҳи ёвари президенти Тоҷикистон оид ба робитаҳои байнулмилалӣ ва собиқ котиби матбуотии президенти Тоҷикистон мебошад.

Дастур миёни диаспораҳои тоҷикон дар Русия тақсим шуда, ҳамчунин аллакай ба мағозаҳои фурӯши китоб ва китобхонаҳои Тоҷикистон ирсол гардидааст. Дар ҳавопаймоҳои хатсайри Русия низ зимни сафар мусофирон метавонанд бо ин дастур шинос шаванд.

Ин дастур барои омӯзиши мустақилонаи таърихи Русия аз давраи қадим то замони муосир пешбинӣ шудааст. Ба андешаи таҳиягари он, ҳадаф аз таълифи он кумак ба муҳоҷирони кории тоҷик барои азхуд намудани дониши зарурӣ роҷеъ ба таъриху фарҳанги Русия аст.

Бо такя ба ҳаҷми зиёди адабиёту сарчашмаҳо, муаллиф кӯшидааст, ки дар бораи таъриху фарҳанги Русия ҳарчи бештар маълумот гирдоварӣ намуда, мазмуну мундариҷаи онро мувофиқи имкон дар шакли муъҷазу мухтасар ва бо забони соддаву фаҳмо пешниҳод намояд.

Ба андешаи адиби тоҷик Абдувоҳид Ғаффорӣ, дастури омӯзишии нашршударо метавон «Таърихи Русия барои дӯстдорони Русия» низ ном бурд. «Ин ҷо муаллиф ба ҳеҷ ваҷҳ ба ҳаяҷон роҳ надода, танҳо ҳолати рӯҳии он касонеро ифода кардааст, ки Русия барояшон хонаи дуюм шудаасту дар он ҷо онҳо сарпаноҳу умед, имкони кору таъмини рӯзгорро дарёфтаанд», - қайд кардааст Ғаффорӣ.