Бо сабаби хуруҷи коронавирус бисёре аз шаҳрвандони Тоҷикистон, ки дар хориҷи кишвар таҳсил мекунанд, дубора ба таҳсил рафта наметавонанд. Дар ҳамин ҳол, фаҳмидан мехоҳанд, ки оё онҳоро ба хизмати ҳарбӣ даъват карда метавонанд?

“Ман донишҷӯйи соли ҷоруми яке аз мактабҳои олии Чин мебошам. Бо сабаби хуруҷи коронавирус барои идомаи таҳсил аз Тоҷикистон ба Чин рафта наметавонам. Оё дар Тоҷикистон ҳуқуқ доранд, ки маро ба хизмати ҳарбӣ даъват кунанд?”

“Писари ман дар Чехия таҳсил дошта, ҳозир дар Тоҷикистон аст. Дар бораи таҳсил ҳамаи ҳуҷҷатҳои тасдиқкунанда дорад. Ӯро ба аскарӣ даъват карда метавонанд?”

Бисёре аз донишҷӯён ва волидони онҳо бо чунин суол ба “Азия-Плюс” муроҷиат карданд.

Дар Вазорати мудофиаи Тоҷикистон ба “Азия-Плюс” дар мавриди ин масъала изҳор доштанд, ки давоми таҳсил ба донишҷӯён аз хизмат дар артиш таъхири муваққатӣ дода мешавад.

“Бар асари хуруҷи коронавирус қариб дар ҳамаи мактабҳои олии кишварҳои хориҷӣ таътили муваққатӣ эълон шудааст. Вақте ки пандемия ба охир мерасад, онҳо ба таҳсил идома дода метавонанд. Дар давоми таҳсил хизмати донишҷӯён, аз ҷумла, шаҳрвандони Тоҷикистон низ муваққатан ба таъхир гузошта мешавад. Аз ин рӯ, онҳо аз даъват ба хизмати ҳарбӣ озоданд”, - гуфт котиби матбуотии Вазорати мудофаи ҶТ Ориф Нозимиён.

Дар навбати худ, сухангӯйи Вазорати маориф ва илми ҶТ ба “Азия-Плюс” хабар дод, ки ҷойи таҳсил дар мактабҳои олии кишварҳои хориҷӣ ва ҷойҳо дар хобгоҳҳои донишҷӯёни тоҷик дар ихтиёри онҳо боқӣ монда, бо хоҳиши худ метавонанд таҳсилро дар ватан идома диҳанд.

Мутобиқи моддаи 21, банди “В”-и қонуни ҶТ “Дар бораи уҳдадории умумии ҳарбӣ ва хизмати ҳарбӣ”, ба онҳое, ки бори аввал дар шуъбаҳои рӯзонаи муассисаҳои таълимии маълумоти олии касбӣ таҳсил мекунанд, муҳлати даъваташон ба хизмати ҳарбӣ дар давраи таҳсил ба таъхир андохта мешавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.