Нафақахӯрони Тоҷикистон 15% афзоиши иловапулиро ба нафақаҳои худ мувофиқи фармони президент аз 4 август нагирифтанд. Миқдори ками онҳо ҳамагӣ 10% иловапулӣ гирифта тавонистанд. Мақомоти маҳалии Агентии суғуртаи иҷтимоӣ ва нафақа вазъиятро шарҳ намедиҳанд. Телефонҳои Агентӣ, ки дар сомонаи расмии он зикр шудааст, кор намекунанд ё касе дар он ҷо гӯширо намебардорад.

Каср (камбуд)-и буҷети нафақа - 147 млн сомонӣ

Тибқи маълумоти Агентӣ, айни замон шумори нафақахӯрон дар Тоҷикистон зиёда аз 711 ҳазор нафарро ташкил медиҳад. Ҳаҷми миёнаи нафақа дар ҷумҳурӣ ба 303 сомонӣ баробар аст.

Ҳаҷми миёнаи нафақаи меҳнатӣ - 363, суғуртавӣ - 271,71 ва иҷтимоӣ - 169,70 сомониро ташкил медиҳад.

Дар ҷаласаи ҳайати мушовараи Агентӣ зикр шуд, ки мувофиқи натиҷаҳои ҷамъбасти пешакӣ, дар 9 моҳи соли 2020 ба буҷети суғуртаи иҷтимоӣ ва нафақа аз ҳисоби андози иҷтимоӣ 1991,6 млн сомонӣ ворид гардидааст, ки нисбати нақшаи пешбинишуда, ки 2138,6 млн.сомониро ташкил медод, 147,0 млн.сомонӣ кам мебошад.

Қисми хароҷотии буҷети суғуртаи иҷтимоӣ ва нафақа дар давраи ҳисоботӣ ба 2116,6 млн.сомонӣ расида, бо мақсади риояи қатъии низоми таъмини моҳ ба моҳи нафақа ва кумакпулиҳои иҷтимоӣ, 586,5 млн сомонӣ аз ҳисоби маблағҳои мутамаркази Агентӣ ба вилоятҳо ва шаҳру ноҳияҳо ҷудо карда шудааст.

Бозҳисобӣ (индексатсия)-и асноди нафақавӣ бо мақсади зиёдшавии нафақаҳо ва индексатсияи қисми суғуртавии нафақаҳои суғуртавӣ дар сатҳи ҷумҳурӣ пурра ва саривақт анҷом дода шуда, шумораи нафақагироне, ки ба зиёдшавӣ ва индексатсия фаро гирифта шуданд, 513047 нафарро ташкил додааст.

Нархҳо боло мераванд, вале ба нафақахӯрон иловапулӣ намедиҳанд...

Дар ҳамин ҳол, нафақахӯрон шикоят мекунанд, ки ба онҳо ҳатто моҳҳои наздик аз нав ҳисобкунии нафақаҳояшонро ваъда намекунанд.

Нафақахӯр аз Душанбе Виктор В. мегӯяд, мақомоти маҳаллии Агентии таъминоти иҷтимоӣ умуман шикояти нафақахӯронро нодида гирифта, телефонҳои Агентӣ кор намекунанд.

“Ба куҷо муроҷиат карданамонро намедонем, маълум нест, ки моҳи оянда нафақаҳоямон аз нав ҳисоб мешавад ё не”, - мегӯяд ӯ.

Яке аз занони нафақахӯр, ки нахост номаш ифшо шавад, шикоят мекунад, ки нафақааш 300 сомонӣ буда, дар шуъбаи таъминоти иҷтимоии ноҳияи Шоҳмансур ба ҷойи 345 сомонӣ (15% афзоиш) 330 сомонӣ маблағ навиштаанд.

Нафақахӯрон бар ин назаранд, ки бар асари афзоиши нархҳо ба маҳсулот, болоравии “хеле кам”-и ҳаҷми нафақа қариб эҳсос намешавад.

Ёдрас мекунем, ки бо қарори ҳукумати Тоҷикистон, аз 1 сентябр маоши кормандони ташкилотҳои буҷетӣ, инчунин ҳаҷми нафақа ва стипендияҳо ба андозаи 15% зиёд карда шуд.

Дар ҳамин ҳол

Муаллифони раддабандии ҳамасолаи Барномаи озуқавории ҷаҳон (БОҶ) Тоҷикистонро ба сафи 20-гонаи давлатҳо бо арзиши нисбии баландтарини маҳсулоти ғизоӣ шомил кардаанд.

“Он ҷо барои хӯроки нисфирӯзӣ ё шоми начандон серғизо ба ҳисоби миёна 13% аз пули дар як рӯз бадастоварда сарф мешавад. Барои муқоиса: дар Ню-Йорк ин нишондиҳанда ба 0,6% аз даромади якрӯза баробар аст”, - изҳор доштааст роҳбари БОҶ Дэвид Бисли.

Дар гузориши нави СММ низоъҳо, тағйирёбии иқлим, буҳрони иқтисодӣ ва илова бар он, пандемияи Covid-19 аз ҷумлаи сабабҳои камғизоӣ ва гуруснагӣ дар ҷаҳон унвон шудаанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.