Сергей Собянин, шаҳрдори Москваи Русия "афви ковид" эълом кард.

Собянин дар шабакаҳои иҷтимоӣ навишт, мақомоти Москва ҷаримаҳоеро нахоҳанд ситонид, ки барои вайрон кардани маҳдудиятҳои вабои ковид таъйин шуда буданд.

"Ҷаримаҳои маъмурӣ дар ҳалли масъалаи наҷоти саломатӣ ва ҳаёти сокинони шаҳр нақши барҷаста доштанд, барои мубориза бо вабои ковид мусоидат карданд. Имрӯз ин хатар рафъ шуд. Ҳоло - хатарҳо ва мушкилоти дигар аст. Мо уфти воқеии даромади мардумро мебинем. Аз ҳамин хотир ман тасмим гирифтам, ки авфи ковид эълом кунам", - омадааст дар хабари шаҳрдори Москва.

Вай илова кардааст, ин тасмим "бо ҳадафи коҳиши оқибатҳои фишори таҳримҳо" гирифта шудааст.

Афв аз 1 июни соли ҷорӣ ба иҷро медарояд. Ҳамчунин, ба сокинон маблағи ҷаримаҳоеро бармегардонанд, ки онҳо пардохта буданд.

Бештари маҳдудиятҳои марбут ба вабои коронавирус дар Москва охири моҳи феврал ва аввали моҳи март бардошта шуданд.

Дар як рӯзи охир дар Москва 172 ҳолати нави гирифторӣ ва 15 ҳолати марг аз вабои коронавирус сабт шудаатс. Дар маҷмух дар он шаҳр бештар аз 2,5 млн ҳолати гирифторӣ сабт гардидааст.

Дар TelegramFacebookInstagramOK ва ВК бо мо бимонед.