Бар асари садамаи нақлиёт, ки соати 19:30 дақиқаи рӯзи 6 август дар роҳи Душанбе - Кӯлоб - Хоруғ рух дод, 10 нафар ҳалок ва 13 нафар ҷароҳат бардоштанд. Дар назди бозори “Сомонӣ”-и шаҳри Кӯлоб мошини боркаш якчанд автомашинаҳои сабукравро пахш намуда, ба хонаҳо бархӯрдааст.
Тавре ки ВКД Тоҷикистон хабар медиҳад, мошии боркаш бинобар сабаби аз кор баромадани маҷмӯи боздории (тормоз) воситаи нақлиёт, пайдо гардидани носозии техникӣ ва аз уҳдаи идора намудани воситаи нақлиёт набаромадани ронанда ба садама дучор гаштаааст.
Гуфта мешавад, автомашинаи “Дулан” якчанд воситаҳои нақлиётро пахш намуда, вориди ду манзили зисти шаҳрвандон мегардад, ки дар натиҷа зарари ҷонӣ ва молӣ ба қайд гирифта шудааст.
Аммо то ҳол ВКД ва Кумитаи ҳолатҳои фвақулода дар бораи теъдоди дақиқи ҳалокшудагон ва ҷароҳатбардоштагон расман хабар надодаанд.
Як манбаъ дар Раёсати тандурустии вилоят ба “Азия-Плюс” хабар дод, ки тибқи маълумоти пешакӣ, 10 нафар ҳалок шуда, боз 13 тан ҷароҳат бардошаанд: ду кас пас аз ёрии аввалияи тиббӣ ба хонаҳояшон рухсат дода шуда, боқимонда бистарӣ шудаанд.
Радиои Озодӣ бо истинод ба манбаъҳои худ хабар медиҳад, ки бар асари ин садама 14 нафар ба ҳалокат расидаанд.
Тибқи иттилои ВКД, автомашинаи боркаши “Дулан” ба ширкати “Кафолат Воридоту Содирот” тааллуқ доштааст.
Ба гуфтаи шоҳидони ҳодиса, мошии боркаш аз нишебии самти ноҳияи Шамсиддини Шоҳин бо суръати баланд поён шудааст ва дар назди бозори "Сомонӣ"-и Кӯлоб ба самти муқобили роҳ ҳаракат карда, чандин мошинро пахш карда, ду манзили зистро тахриб кардааст.
Бо супориши президенти ҷумҳурӣ Эмомалӣ Раҳмон вазирони корҳои дохилӣ, тандурустӣ ва ҳифзи иҷтимоии аҳолӣ, инчнуин раиси Кумитаи ҳолатҳои фавқулода ва раиси вилояти Хатлон ва дигар масъулин ба ҷойи ҳодиса сафарбар карда шуданд.
Дар маълумоти ВКД зикр мегардад, ки вобаста ба ин ҳодиса аз ҷониби мақомоти Прокуратура парвандаи ҷиноятӣ оғоз карда шуда, тафтишоти пешакӣ ба роҳ монда шудааст.
Руcский