Ҷонибек Ҳикмат, намояндаи доимии Тоҷикистон дар Созмони миллали муттаҳид ба мақоми президенти Шӯрои иҷроияи ЮНИСЕФ (Бунёди кӯдакони СММ) барои соли 2025 интихоб гардидааст.

Дар ин бора ба “Азия-Плюс” дар намояндагии ЮНИСЕФ дар Тоҷикистон иттилоъ доданд.

Дар ин ниҳод гуфтанд, ки дар соли ҷорӣ Ҷонибек Ҳикмат ин мақомро роҳбарӣ мекунад ва ин ба Тоҷикистон имконият медиҳад дар ташаббусҳои байналмилалӣ, ки барои беҳтар кардани шароити зиндагии кӯдакон дар саросари ҷаҳон равона шудаанд, фаъолона иштирок намояд.

Бояд гуфт, ки Шӯрои иҷроияи ЮНИСЕФ аз 36 аъзо иборат буда, вазифаи назорат ва арзёбии фаъолияти ин бунёдро бар ӯҳда дорад. Президенти Шӯро ва аъзои он ҳамчун ҳамоҳангсоз байни котиботи ЮНИСЕФ ва гурӯҳҳои минтақавӣ амал карда, ба масъалаҳои маъмурӣ ва амалкардӣ (функсионалӣ) тамаркуз мекунанд.

Ҷонибек Ҳикмат кист?

Ҷонибек Ҳикмат соли 2021 бо фармони раисҷумҳури Тоҷикистон сафир ё намояндаи нави Тоҷикистон дар Созмони милали Муттаҳид  таъин шуд. Ӯ то имрӯз дар ин вазифа фаъолият мекунад.

Номбурда қаблан дар солҳои 2010 - 2014 ҳамчун котиби дуюм дар сафоратҳои Тоҷикистон дар Иёлоти Муттаҳидаи Амрико ва Британияи Кабир фаъолият кардааст. Ӯ ҳамчун котиби дуюм дар Дастгоҳи Вазорати корҳои хориҷии Тоҷикистон низ адои вазифа кардааст.

Ҷонибек Ҳикмат солҳои 2016 - 2019 дар намояндагии доимии Тоҷикистон дар Созмони Милали Муттаҳид дар вазифаҳои котиби аввал ва мушовир фаъолият кардааст.

Ӯ хатмкардаи Eastern Mediterranean University-и Кипр аст.

Номбурда оиладор буда, соҳиби се фарзанд мебошад.

Дар Telegram, Facebook ва Instagram бо мо бимонед.