Дар 11 мавзеи кӯчаву хиёбонҳои Душанбе гулгаштҳо сохта мешаванд. Барои сохтани онҳо зиёда аз 2 млн гулҳои мавсимӣ истифода мешаванд. Дар ин бора ба “Азия-Плюс” аз шуъбаи сохтмон ва ободонии дастгоҳи раиси шаҳри Душанбе хабар доданд.
Дар дастгоҳи раиси пойтахт изҳор доштанд, ки шаҳри Душанберо ба муносибати нишасти сарони давлатҳои Иттиҳоди Давлатҳои Мустақил (ИДМ), ки рӯзи 10-уми октябри соли 2025 баргузор мешавад, омода мекунанд.
Гулгаштҳои ҷолиб аллакай дар майдони назди бинои парлумони Тоҷикистон, Театри опреа ва балети ба номи Садриддин Айнӣ, Донишкадаи давлатии санъат ва дигар ҷойҳо гузошта шудаанд. Гузоштани онҳо дар дигар мавзеъҳои шаҳр идома доранд.
Гулгаштҳо бо иштироки КВД “Рекламаи берунӣ ва ороишӣ”-и шаҳри Душанбе сохта шуда, гулҳои мавсимӣ дар КВД “Сабзкорӣ” парвариш ёфтаанд.
Дар муассиса зикр карднд, ки гулҳо бо маблағи шаҳрдорӣ харидаву парвариш мешаванд ва барои сохтани гулгаштҳо қариб ҳамаи кормандони хадамоти коммуналӣ ҷалб шудаанд.
Нишасти ИДМ, вохӯрии "Осиёи Марказӣ - Русия" ва сафари Путин
Ёдрас мекунем, ки моҳи октябр шаҳри Душанбе ба майдони рӯйдодҳои муҳими байнулмилалӣ табдил меёбад. Рӯзи 10-уми октябр нишасти ИДМ доир мегардад. Дар Душанбе интизорӣ доранд, ки натиҷаҳои он ба рушди ИДМ такони нав бахшида, ваҳдату ягонагии кишварҳои ИДМ-ро мустаҳкамтар месозад.
Дар доираи нишаст дар Душанбе ҳамчунин вохӯрии сарони кишварҳо дар қолаби “Осиёи Марказӣ - Русия” баргузор мешавад.
Пеш аз нишаст рӯзи 9-уми октябр президенти Русия Владимир Путин бо сафари давлатӣ ба Тоҷикистон меояд. Дар ҷараёни гуфтушунидҳо баррасии масоили муҳиму рӯзмарраи ҳамкориҳои дуҷониба ва минтақавӣ дар назар аст. Владимир Путин ҳамчунин дар кори нишасти “Осиёи Марказӣ - Русия” иштирок мекунад.
Қобили зикр аст, ки ҷаласаи охири сарони кишварҳои ИДМ рӯзи 8-уми октябри соли 2024 дар Маскав таҳти раёсати Русия доир гардид. Он замон тасмим гирифта шуда буд, ки аз 1-уми январи соли 2025 раёсат дар ИДМ ба дӯши Тоҷикистон вогузор мегардад.
Нишасти якум дар қолаби “Осиёи Марказӣ - Русия” моҳи октябри соли 2022 дар Остона ба муносибати 30-солагии роҳандозии муносибатҳои дипломатӣ байни Русия ва панҷ кишвари Осиёи Марказӣ баргузор шуда буд.
Руcский