Роҳбари олии Эрон Оятуллоҳ Алии Хоманаӣ баъди дар Теҳрон кушта шудани раҳбари дафтари сиёсии Ҳамос Исмоил Ҳания дастур дод, ки кишвараш ба Исроил ҳамла кунад. Дар ин бора рӯзномаи New York Times (NYT) дирӯз, 31-уми июл, бо такя ба се мақомдори эронӣ иттилоъ дод.
Ба иттилои манбаъ, ин фармон субҳи чаҳоршанбе дар нишасти изтирории Шӯрои олии амнияти миллии Эрон пас аз маълум шудани куштори раиси дафтари сиёсии Ҳамоси Фаластин Исмоил Ҳания аз ҷониби Исроил дар Теҳрон содир шудааст.
Аммо то ба ҳол намояндагони Нерӯҳои дифои Исроил тасдиқ ё рад накардаанд, ки дар куштори раиси дафтари сиёсии Ҳамос даст доранд ва ё на.
Моҳи апрел пас аз кушта шудани афсарони Сипоҳи посдорони инқилоби исломӣ дар ҳамлаи Исроил ба Димишқ, Эрон ба Исроил ҳамлаи густурда анҷом дода, ба сӯйи он садҳо мушак ва ҳавопаймоҳои бесарнишин партоб карда буд.
Хабаргузории NYT менависад, ки Теҳрон вокуниши худро пешакӣ эълон кард ва аксари ҳадафҳои ҳавоӣ боздошт шуданд.
Ҳоло маълум нест, ки ҳамлаи Теҳрон чӣ гуна хоҳад буд.
Ба гуфтаи манобеъ, фармондеҳони низомии Эрон имкони ҳамлаи муштараки як ҳавопаймои бесарнишин ва мушакиро ба ноҳияҳои Тел-Авив ва Хайф баррасӣ мекунанд, аммо талош доранд ғайринизомиёнро ҳадаф қарор надиҳанд.
Эрон метавонад қувваҳои муттаҳидро дар Яман, Сурия ва Ироқ ҷалб кунад.
Дар Эрон дар тамоми масъалаҳои давлатӣ сухани ниҳоӣ аз Хоманаӣ аст, зеро ӯ сарфармондеҳи нерӯҳои амниятист. Ба гуфтаи ҳамсӯҳбатони NYT, вай ба ҳайати Сипоҳи посдорони инқилоби исломӣ ва артиши кишвараш дастур додааст, ки ба густариши эҳтимолии даргириҳо дар Ховари Миёна, аз ҷумла ҳамлаҳои эҳтимолии Исроил ва Амрико ба Эрон омода шаванд.
Исмоил Ҳания шаби 30 ба 31-уми июл бар асари сӯйиқасд дар Теҳрон кушта шуд. Ҳамла ба қароргоҳи раиси дафтари сиёсии Ҳамос пас аз ширкати ӯ дар маросими савгандёдкунии раисҷумҳури тозаинтихоби Эрон Масъуд Пизишкиён сурат гирифт. Он вақт Сипоҳи посдорони инқилоби исломӣ гуфт, сабабҳои ҳодиса таҳқиқ мешаванд.
Намояндаи расмии Вазорати корҳои хориҷаи Эрон Носир Канонӣ ба мардуми Фаластин изҳори ҳамдардӣ кард ва Пизишкиён ваъда дод, ки қотилони раиси дафтари сиёсии Ҳамос аз кардаи худ пушаймон хоҳанд шуд.
Президенти Фаластин Маҳмуд Аббос низ дар навбати худ куштори Ҳанияро маҳкум кард, дар ҳоле ки вазири умури Байтулмуқаддас ва мероси Исроил Амихай Элиёҳу ин ҳодисаро “роҳи дурусти поксозии ҷаҳон аз бадиҳо” номид.
Вазъ дар Ховари Миёна субҳи 7-уми октябри соли 2023, замоне шиддат гирифт, ки гурӯҳи фаластинии Ҳамос Исроилро ҳадафи мушакҳои худ қарор дода, ба манотиқи марзии қисмати ҷануби кишвар ҳамла кард ва гаравгонҳо гирифт. Худи ҳамон рӯз Исроил ба ҳамлаҳои ҷавобӣ шурӯъ кард.
Руcский