Тибқи назарпурсии Федератсияи футболи Тоҷикистон (ФФТ), нимҳимоятгари дастаи футболи «Истиқлол» (Душанбе) Хуршед Маҳмудов, мураббии тими «Энергетик» (Душанбе) Алишер Тӯхтаев ва довари ФИФА Парвиз Муртазоев (Душанбе) бозингар, мураббӣ ва довари беҳтарин дар моҳи апрел дониста шуданд.

Нимҳимоятгари дастаи «Истиқлол» Хуршед Маҳмудов моҳи апрел 4 тӯбро ба ҳадаф расонида, нишонраси беҳтарини Лигаи олии футболи мамлакат аст. Дастаи «Энергетик» таҳти раҳбарии мураббӣ Алишер Тӯхтаев моҳи апрел се бозӣ (ду бозӣ дар сафар) анҷом дода, 5 имтиёз ба даст овард ва айни замон дар ҷадвал зинаи сеюмро ишғол мекунад. Моҳи апрел довари ФИФА Парвиз Муртазоев се бозӣ – «Истиқлол» - «Регар-ТадАЗ» (1:0), «Энергетик» - «Парвоз» (1:0) ва «КМВА «Помир» - «Регар-ТадАЗ» (0:3)-ро доварӣ кард.

Қобили зикр аст, ки ҷоизадорони моҳи апрел – Хуршед Маҳмудов, Алишер Тӯхтаев ва Парвиз Муртазоев аз ҷониби Федератсияи футболи Тоҷикистон дар ҳаҷми 500-сомонигӣ бо мукофотпулӣ сарфароз гардонида мешаванд.

Ёдрас мекунем, ки дар моҳи март ҳамлагари тими «Истиқлол», легионер аз Гана Дэвид Мауто, сармураббии дастаи «Истиқлол» Мубин Эргашев ва довари ФИФА Хуршед Дадобоев аз Хуҷанд беҳтарин бозигар, беҳтарин мураббӣ ва беҳтарин довар эълон шуда буданд.