Лоиқ Раҷабов, размикори маъруфи тоҷик, ки дар набарди аввалаш дар UFC (Ultimate Fighting Championship) пирӯз шуд, ҳамчунин дар доираи мусобиқоти ин ташкилоти варзишӣ рекорд гузоштааст: Ӯ 11 партоби муваффақ (тейкдаун) анҷом додааст. Дар ин бора ташкилоти UFC дар “Twitter” хабар додааст.

Манбаъ навиштааст, ки “Лоиқ Раҷабов имрӯз, 11 партоби муваффақ анҷом дод, ки дар миёни сабуквазнҳо рекорд дониста мешавад”.

Гуфта мешавад, ки то ин дам ягон варзишгар дар вазни сабук дар аввалин рақобаташ 11 партоби муваффақ анҷом надода буд.

Бояд гуфт, ки Лоиқ Раҷабов дар набарди аввалинаш дар “UFC 285” бар Эстебан Рибовичи аргентинӣ пирӯз шуд. Муҳориба шаби 4 ба 5 март дар Лас Вегас дар доираи мусобиқаи UFC 285 дар толори «T Mobile» сурат гирифт.

Варзишгари аргентинӣ то ин дам 11 рақобат гузаронда дар ҳамаи онҳо ғолиб шуда буд. Лоиқ Раҷабов дар корномаи варзишиаш 17 ғалаба ва 4 бохт дорад.

Ёдовар мешавем, ки рӯзи 26-уми феврал размикори дигари тоҷик Нурулло Алиев низ дар набарди аввалинаш дар UFC бар Рафаэл Алвеси бразилӣ пирӯз шуда буд.

Мусобиқа дар шаҳри Лас-Вегаси иёлати Невадаи ИМА баргузор гардида буд.

Рақиби Алиеви 22-сола Рафаэл Алвеси 32-солаи бразилӣ дар UFC (Ultimate Fighting Championship) рақобати чаҳоруми худро доир кард. Ӯ дар як набард пирӯз шуда, дар сетоаш мағлуб гаштааст. Дар маҷмӯъ, Алвес дар MMA 20 ғалаба ва 12 бохт дорад.

Дар Telegram, Facebook, Instagram, OK ва ВК бо мо бимонед.