Шӯрои олимпии Осиё барои сохтмони майдони варзиши сабук бо роҳравҳои резинӣ ва майдонҳои волейбол, баскетбол ва футбол дар Тоҷикистон беш аз 1,5 млн сомонӣ маблағгузорӣ мекунад.  Дар ин бораи саҳифаи Кумитаи милли олимпии кишвар хабар додааст.

Ин иншоот дар ҳудуди Донишкадаи тарбияи ҷисмонии Тоҷикистон ба номи С. Раҳимов дар доираи барномаи “Олимп Осиё”-и Шӯрои олимпии Осиё барои варзиши сабук сохта мешавад.

Манбаъ иттилоъ медиҳад, ки ин масъала дар вохӯрии Раҳмонзода Абдулло, ноиби Президенти Кумитаи миллии олимпии кишвар бо Ҳусейн Ал-Мусаллам, директори генералии Шӯрои олимпии Осиё, ки рӯзи 5-уми июн дар кишвари Баҳрайн баргузор гардидааст, мавриди баррасӣ қарор гирифтааст.

Раҳмонзода Абдулло ва Ҳусейн Ал-Мусаллам
Кумитаи миллии олимпии Тоҷикистон
“Зимни баргузории мулоқот ҷонибҳо масъалаҳои рушди инфрасохтори соҳаи варзиш дар ҷумҳурӣ, омодагиҳои ҳамаҷониба ба мусобиқаҳои байналмилалӣ ва қоравӣ, тадбиқи барномаҳои соҳавии Шӯрои олимпии Осиё дар қаламрави Ҷумҳурии Тоҷикистон ва дигар масъалаҳои муҳими соҳаи варизишро мавриди баррасӣ қарор додаанд”,- хабар медиҳад манбаъ.

Пешниҳоди сохтани иншооти мазкурро Раҳмонзода ба директори генералии Шӯрои олимпии Осиё ироа кардааст ва ҷавоби мусбат гирифтааст.

Маълум нест, ки сохтмони ин майдон кай оғоз мешавад. 

Дар Telegram, Facebook, Instagram, OK ва ВК бо мо бимонед.