Душанбе. 1-уми июли с.2008. ОИ «Азия-Плюс» - Зимни вохӯрии вазири рушди иқтисод ва савдои ҶТ Ғуломҷон Бобозода бо вазири тиҷорати Ҷумҳурии Халқии Чин Чэн Дэмин дар ҳошияи мулоқоти Комиссияи байниҳукуматии Чин ва Тоҷикистон масъалаҳои густариши равобити ҳамкории иқтисодӣ ва тиҷоратӣ мавриди баррасӣ қарор гирифтанд.

Ҷонибҳо атрофи масоили ба роҳ мондани ҳамкории иқтисодӣ ва техникӣ дар соҳаи сохтмону энергетика, савдову тиҷорат, андозбандии имтиёзнок, амнияти энергетикиву ғизоӣ ва мушкилоти таъмини раводид барои шаҳрвандони кишварҳо табодули назар карданд.

Вазири рушди иқтисод ва савдои ҶТ ба намояндагони Чин тақвияти ҳамкориҳоро дар риштаи истеҳсоли сарчашмаҳои барқароршавандаи энергия пешниҳод кард ва инчунин густариши муносибатҳоро дар сохтмони нерӯгоҳҳои хурди обию барқӣ, ҷустуҷӯи геологии маъданҳои кӯҳӣ зарур арзёбӣ намуд.