Душанбе. 8-уми июл. ОИ « Азия-Плюс » - Аксари аҳзоби сиёсии Тоҷикистон лоиҳаҳои алтернативии такмили Қонунҳои ҶТ «Дар бораи интихоботи Маҷлиси Олии ҶТ» ва Қонуни ҶТ «Дар бораи интихоботи вакилон ба Маҷлисҳои маҳаллии вакилони халқ»-ро, ки дар чаҳорчӯбаи барномаи Бунёди байнулмилалии низомҳои интихоботӣ (IFES)   таҳти унвони «Мусоидати касбӣ дар баргузорӣ ва ислоҳоти интихобот дар ҶТ» таҳияву омода гардида буданд, дастгирӣ карданд.

Ба санадҳо намояндагони Комиссияи марказии интихобот ва райъпурсии ҶТ, Маркази тадқиқоти стратегии назди президенти ҶТ, Ҳизби Коммунисти Тоҷикистон, Ҳизби Демократи Тоҷикистон, Ҳизби наҳзати исломии Тоҷикистон, Ҳизби Сотсиалистии Тоҷикистон, Ҳизби Сотсиал-Демократии Тоҷикистон ва Ҳизби ислоҳоти иқтисодии Тоҷикистон имзо гузоштанд.

Ҳамчунин намояндаи Ассотсиатсияи миллии сиёсатмадорони Тоҷикистон низ лоиҳаҳоро имзо кард.

Дар маросими ба имзо расидани ҳуҷҷатҳо намояндагони ваколатдори Ҳизби Халқии Демократии Тоҷикистон ва Ҳизби аграрии Тоҷикистон ҳузур надоштанд.

Интизор меравад, ки лоиҳаҳои алтернативии мазкур моҳи октябр расман ба парлумон равона карда мешаванд. Рӯзҳои наздик нусхаҳои лоиҳаҳоро ният доранд, ба Дастгоҳи иҷроияи президенти ҶТ низ ирсол кунанд.

Ёдрас мекунем, ки лоиҳаҳо дар муддати як моҳ аз ҷониби гурӯҳи махсуси кории ҳизбҳои расман амалкунандаи ҶТ бо дастгирии IFES таҳия гашта буданд.