Хоруғ. 18-уми июл. ОИ «Азия-Плюс» - Табибони   беморхонаи марказиии Вилояти Мухтори Кӯҳистони Бадахшон (ВМКБ) дар шаҳри Хоруғ бори нахуст ҷарроҳиҳои бехун   гузарониданд.

Сардори раёсати тандурустии ВМКБ Шодӣ Ҷамшедов ба ОИ «Азия-Плюс» хабар дод, ки   аллакай 12 нафар беморон бо ин усул ҷарроҳӣ шудаанд.

«Эндоскопия ё лапароскопия дар як вақт ҷарроҳии ташхисӣ ва табобатӣ буда, дар муолиҷаи касалиҳои зиёде самараи дилхоҳ медиҳад ва тавассути дастгоҳи махсус (лапораскоп) бо сӯрох кардани бадани инсон бидуни дард ва хунрезӣ сурат мегирад, - гуфт пизишк. - Бо ин усул 35 навъи бемориҳо, аз қабили бемории меъда, рӯда, бемориҳои занона, санги гурда ва ғайраро пурсамар табобат кардан мумкин аст».

Ш.Ҷамшедов афзуд, ки дастгоҳро   ба касалхонаи вилоятӣ   чанд сол қабл   Хазинаи   Оғохон   тӯҳфа карда буд, вале аз сабаби набудани   баъзе   таҳҷизоти лозим   ва мутахассиси ин соҳа    чанд сол   боз он бекор истода буд.    

  Мавсуф зикр кард, ки ахиран    бо кӯмаки Вазорати тандурустӣ   ба вилоят таҷҳизоти лозим   ворид гардида, табибон аз мутахассисони маркази   ҷумҳуриявии такмили ихтисоси кормандони соҳаи тиб ва ҷарроҳии   дил ва рагҳои   хунгард таҷриба меомӯзанд.