Душанбе. 15-уми сентябр. ОИ «Азия-Плюс» - Сафири Тоҷикистон дар Русия Абдулмаҷид Достиев ба ОИ «Азия-Плюс» хабар дод, ки дар байни фавтидагони суқути ҳавопаймо дар Перм шаҳрвандони Тоҷикистон нестанд.

Ёдрас мекунем, ки ҳавопаймои мусофирбари Боинг-737, ки ба ширкати "Аэрофлот- North " тааллуқ доштааст, ҳини нишаст дар фурудгоҳи шаҳри сибирии Перм суқут кард. Ҳама 88 сарнишин ба ҳалокат расиданд.  

  Дар миёни қурбониҳои ин фоҷеа дар баробари сокинони Русия инчунин шаҳрвандони Озарбойҷон, Украина, Фаронса, Швейтсария, Латвия, ИМА, Олмон, Туркия ва Итолиё буданд. Хабаргузории Интерфакс мегӯяд, ки ҷаъбаи сиёҳи ҳавопаймо аллакай мавриди таҳқиқи гурӯҳи тафтишотӣ қарор дода шудааст. Ҳавопаймои мазкурро "Аэрофлот" аз ширкати Pinewatch Limited , воқеъ дар Дублин охирҳои моҳи июли имсол то моҳи марти соли 2013 ба иҷора гирифтааст.