Душанбе. 23-уми сентябр. ОИ «Азия-Плюс» - Аз Сарраёсати нерӯҳои марзбонии Кумитаи давлатии амнияти миллии Тоҷикистон ба ОИ «Азия-Плюс» хабар доданд, ки рӯзи шанбеи ҳафтаи гузашта дар ағбаи Қулма ба муносибати гузоштани аломатҳои сарҳадӣ дар марзи Тоҷикистону Чин маросими ботантана доир гардид.

«Дар тӯли чаҳор сол марзбонони тоҷик дар ҳамдастӣ бо сарҳадбонони Чин дар шароити номусоиди иқлимиву табиӣ бо корҳои аломатгузорӣ дар марз машғул буданд ва дар ин давра онҳо беш аз 100 аломатҳои сарҳадӣ гузоштанд», - иттилоъ дод манбаъ.

Дар маросими ботантана муовини аввали вазири умури хориҷии Тоҷикистон Абдулло Юлдошев ва мақомоти роҳбарии сохторҳои марзбонии кишварҳо иштирок карданд.

Ёдрас мекунем, ки минтақаи мазкур аз сатҳи баҳр дар баландии 4 ҳазору 365 метр ҷойгир шудааст. Масофаи марзи Тоҷикистону Чин ба беш аз 500 км баробар аст.