Душанбе. 12-уми июл. «Азия-Плюс» — | Моҳи сентябри соли равон дар ноҳияи Варзоб корхонаи истеҳсоли семент бо иқтидори 72 ҳазор тонна дар як сол мавриди истифода қарор мегирад.

Тавре ба ОИ «Азия-Плюс» аз хадамоти матбуоти Вазорати энергетика ва саноати ҷумҳурӣ иттилоъ доданд, таъсиси корхонаи нав – ҶДММ «Тоҷикистон ба таъмини 180 нафар бо ҷойи корӣ шароит фароҳам меорад. «Ғайр аз ин, ба муносибати таҷлили ҷашни 20-умин солгарди истиқлоли Тоҷикистон дар ноҳияҳои Нуробод, Рашт ва Мастчоҳ мавриди истифода қарор гирифтани се корхонаи истеҳсоли хишт ба нақша гирифта шуда, айни замон дар иншооти мазкур корҳои сохтмону насб дар арафаи анҷомёбианд», - гуфтанд дар вазорат.

Бино ба маълумоти Вазорати мазкур, дар нимсолаи аввали соли равон дар ҷумҳурӣ ҳудуди 160 ҳазор тонна семент истеҳсол карда шудааст, ки нисбат ба ҳамин давраи соли гузашта 8,8 ҳазор тонна бештар аст.

Ҳамчунин дар давоми моҳҳои январ-июни соли ҷорӣ дар корхонаҳои ватанӣ 28 млн. дона хишт, 25 ҳазор тонна оҳак ва 49 ҳазор метри мураббаъ шиша истеҳсол шудааст.

Афзоиши ҳаҷми истеҳсоли масолеҳи сохтмон дар корхонаҳои ҶСП «Заводи сементи Самадов» (ш.Исфара), ҶДММ «Ҷ.Собиров» (ш. Табошар), ҶДММ «Лада мармар», ҶДММ «Тоҷикмармар», ҶДММ «Дурдона» ва ғайра ба қайд гирифта шудааст.