Имрӯз, 24-уми январ бо фармони президенти кишвар Завқӣ Завқизода Амин вазири нави рушди иқтисод ва савдои Тоҷикистон таъин шуд. То ин дам ӯ ба ҳайси муовини вазири ин ниҳод кор мекард.

Вазири нав дар ин вазифа Неъматулло Ҳикматуллозодаро иваз кард, ки ӯ низ ҳамин рӯз ёвари президент оид ба масоили иқтисодӣ таъин гардид.

Вазири нав кист?

Завқӣ Завқизода соли 1972 дар ноҳияи Ҳамадонии вилояти Хатлон ба дунё омадааст.

Соли 1995 Донишгоҳи давлатии Тоҷикистонро бо ихтисоси “Баҳисобгирии муҳосибӣ, аудит ва таҳлили фаъолияти хоҷагидорӣ” бо баҳои аъло хатм кардааст.

Соли 2001 дар Донишгоҳи милли Австралия ба дарёфти унвони магистр оид ба рушди иқтисодӣ ва соли 2006 дар ҳамин донишгоҳ ба гирифтани унвони доктори улуми иқтисодӣ ноил шудааст.

Завқӣ Завқизода дар соҳаи иқтисод ва умури бонкӣ таҷрибаи васеи корӣ дорад.

Фаъолияташро соли 1995 дар Бонки миллии Тоҷикистон оғоз карда, то соли 2003 ба ҳайси Иқтисодчии дараҷаи аввали шуъбаи таҳлили иқтисодӣ ва тарҳрезӣ, Сариқтисодчии шуъбаи қарздиҳӣ ва Сардори шуъбаи қарздиҳии Раёсати амалисозии сиёсати пулӣ (монетарӣ) кор кардааст.

Давоми солҳои 2003-2006 дар докторантураи Донишгоҳи миллии Австралия таҳсил намудааст. Ҳамзамон тӯли солҳои 2004-2005 ба сифати омӯзгори фанҳои молиявӣ-иқтисодӣ бо забони англисӣ дар Донишгоҳи мазкур кор кардааст.

Соли 2006 ба ҳайси муовини сардори Раёсати амалиёт дар бозори кушоди Бонки миллии Тоҷикистон ифои вазифа намудааст.

Соли 2007 Завқизода намояндаи Тоҷикистон дар Хазинаи байнулмилалии асъор ва Гурӯҳи Бонки ҷаҳонӣ таъин шуд. Ҳамзамон вазифаи мушовири мудирони иҷроияи ин ду ниҳоди бонуфузи молии байнулмилалиро иҷро мекард.

Солҳои 2011-2014 дар вазифаи роҳбари котиботи Шӯрои машваратии назди президенти Тоҷикистон оид ба беҳтар кардани муҳити сармоягузорӣ машғули кор буд.

Соли 2014 раисҷумҳур ӯро ба вазифаи сармушовири дастгоҳи ёвари президенти Тоҷикистон оид ба масоили иқтисодӣ таъин кард.

Аз моҳи октябри соли 2017 то имрӯз Завқизода дар вазифаи муовини якуми вазири рушди иқтисод ва савдои Тоҷикистон кор мекард.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.