Охири ҳафтаи гузашта раиси шаҳри Душанбе Рустами Эмомалӣ бо ҷараёни корҳои бунёдии як қатор корхонаҳои истеҳсолии сохташаванда дар Минтақаи саноатии шаҳри Душанбе шинос шуд.

Бино ба иттилои дафтари матбуоти шаҳрдории Душанбе, Рустами Эмомалӣ нахуст аз ҶДММ "Ҳурия", ки самти фаъолияташ ба истеҳсоли маҳсулоти нимтайёр ва яхмос пешбинӣ гардидааст, боздид кард.

Гуфта мешавад, корхонаи мазкур дар доираи дастгириҳои давлатии фаъолияти соҳибкорӣ, аз ҷониби соҳибкори инфиродӣ  Расул Мансуров бо харҷи 10 миллион сомонӣ ва дар масоҳати 0,34 гектар бунёд мегардад.

Дар ин корхонаи саноатӣ корҳои асосӣ, аз қабили бунёди бинои истеҳсолӣ ва воридоти таҷҳизот пурра ба итмом расида, феълан насби он бо ҷалби мутахассисон идома дорад. Дастгоҳу таҷҳизоти истеҳсолии корхона аз Ҷумҳурии Мардумии Чин  ворид шудааст.

Бо дастури раиси пойтахт корхона рӯзҳои ҷашни Наврӯзи имсола ба истифода дода мешавад.

Бино ба иттилои масъулин, дар ҶДММ "Ҳурия" ду хатти истеҳсолӣ мавҷуд буда, иқтидори онҳо дар як моҳ аз 5 то 10 тонна маҳсулоти нимтайёр ва яхмос аз мевагиҳо ва қаймоқ пешбинӣ шудааст.

Дар корхона зиёда аз 25 номгӯйи яхмос истеҳсол мешавад. Бо мавриди истифода қарор гирифтани корхона 50 нафар сокинони шаҳри Душанбе, асосан занону бонувон бо ҷойи кору маоши мувофиқ таъмин мегарданд.

Ёдрас мекунем, ки раисҷумҳури Тоҷикистон Эмомалӣ Раҳмон 20-уми сентябри соли 2018 ба сохтмони нуҳ корхонаи нави саноатӣ ҳусни оғоз бахшид.

Минтақаи саноатии шаҳри Душанбе дар масоҳати қариб 9 гектар, дар бурриши кӯчаҳои Садриддин Айнӣ ва Зебуниссои ноҳияи Шоҳмансур ҷойгир мебошад.

Дар минтақаи нави саноатии пойтахт корхонаҳои коркарди нахи пахта, истеҳсоли сарулибос, коркарди хушкмева, сохторҳои оҳанӣ, маҳсулоти электронӣ, нӯшокиҳои мевагӣ, яхмос, коркарди сангҳои ранга ва истеҳсоли маҳсулоти нонӣ сохта мешаванд.

Барои сохтмони минтақаи нави саноатӣ дар маҷмӯъ беш аз 150 млн сомонӣ масраф хоҳад шуд. Интизор меравад, ки дар ин минтақа ба сурати умум зиёда аз 3 ҳазор нафар шаҳрвандон бо ҷойҳои корӣ таъмин мешаванд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.