Имтиёзҳо аз пардохти андоз дар соли оянда мутобиқи қонун “Дар бораи Буҷети давлатии ҶТ барои соли 2025” аз рӯи 17 банд пешниҳод мешаванд.
Миёни имтиёздорон меҳмонхонаи 5-ситорадори “Исмоили Сомонӣ” зикр шудааст, ки қариб 19 сол инҷониб сохтмонаш дар Душанбе ҷараён дорад.
Қобили зикр аст, ки маросими оғози сохтмони иншооти мазкур ҳанӯз 15 марти соли 2006 баргузор шуда, дар аввал пурра ба охир расидани корҳои сохтмон дар он дар муддати якуним сол пешбинӣ шуда буд.
Дар соли 2025 фармоишгар ва паймонкори кулли ин иншоот танҳо 50%-и андоз аз арзиши иловашуда (14%) ва андоз аз даромади шахсони ҳуқуқӣ (18%)-ро пардохт мекунанд.
Соли оянда ҳамчунин ба бинокорони Театри миллӣ дар Душанбе, бинои нави Вазорати саноат ва технологияҳои нав, варзишгоҳ бо 30 ҳазор ҷой нишаст дар Душанбе ва чанде аз дигар иншоот дар пойтахт ва минтақаҳои кишвар чунин имтиёзҳо дода мешаванд.
Меъёри Андоз аз арзиши иловашуда (ААИ) барои ворид намудан, коркард ва фурӯши маҳсулоти аз гандум коркардшуда (ба истиснои гандуми воридшуда барои истеҳсоли нӯшокиҳои спиртӣ), инчунин маснуоти макаронии дар ҶТ истеҳсолшуда дар сатҳи 10% (меъёри стандартии ААИ 15%-ро ташкил медиҳад) муқаррар шудааст.
Ғайр аз ин, воридоти техника, воситаҳои нақлиёти махсус ва қисмҳои эҳтиётии онҳо, автобус, ки номгӯй ва шумори онҳо аз ҷониби ҳукумати ҶТ муайян карда мешаванд ва аз ҳисоби маблағҳои буҷети ҷумҳуриявӣ ва буҷети шаҳри Душанбе харида мешаванд, бо мақсади зиёд кардани шумори парки нақлиёти ва беҳбуди соҳаи ҷудогонаи пойтахт равона мешаванд, аз меъёри муқарраршудаи ААИ дар ҳаҷми 50% ва пурра аз пардохти боҷи содиротӣ озод карда мешаванд.
КВД “Оид ба истеҳсол, харид, захира ва фӯруши маҳсулоти ниёзи аввалия дар шаҳри Душанбе” аз пардохти ААИ зимни фурӯши маҳсулоти хӯрокворӣ, инчунин воридоти маҳсулоте, ки номгӯи онҳо аз ҷониби ҳукумати ҶТ муайян карда мешавад, дар ҳаҷми 50% аз меъёри муқарраршуда ва пурра аз пардохти боҷи содиротӣ озод карда мешавад.
Ба маблағи қарзи ҶСК “НБО Сангтӯда-1” ва ҶСК “НБО Роғун”, ки аз ҳисоби интиқоли барқ ба ҶСК “Барқи тоҷик” ба миён омадаанд, фоизҳо ҳисоб карда намешаванд.
Ҳамчунин дар соли оянда ба воридкунандагони мазути серсулфур барои Маркази барқу гармидиҳии Душанбе, Федератсияи футболи Тоҷикистон, воридкунандаи бланкаи шиносномаҳо (ВКХ ҶТ), ки ҳомилҳои электронӣ доранд, баъзе паймонкорони неругоҳи “Роғун”, Агентии захираҳои давлатии моддии назди ҳукумати ҶТ, воридкунандагони навъҳои муайяни тухмиҳо ва гулу буттаҳои ороишӣ, дарахтони ороишӣ барои шинонидан дар боғу кӯчаҳои пойтахт, содиркунандагони битуми КВД “Роҳсоз” ва сохтмончиёни бинои филиали Донишкадаи рушди менеҷменти Сигапур дар Душанбе ва дигарон аз пардохти андоз имтиёзҳо дода мешавад.
Руcский