Душанбе. 17-уми феврал. ОИ «Азия-Плюс» - Ахири ҳафтаи сипаригашта Вазорати маорифи ҷумҳурӣ ва намояндагии котиботи стратегияи байнулмилалии СММ оид ба коҳиши офат Ёддошти ҳамкорӣ ба имзо расониданд.

Тавре сухангӯи вазорати маориф Ноилшо Нуралиев ба ОИ «Азия-Плюс» хабар дод, ёддошт бо мақсади эҳёи ҳамкориҳои дуҷонибаи судманд дар бахши маориф, аз ҷумла иҷрои талаботи «Барномаи амалисозии Хиого», ки ҳукумати Тоҷикистон аз он пуштибонӣ кардааст, ба имзо расид.

Ба гуфтаи Н.Нуралиев, ҳамкории мазкур дар чаҳорчӯбаи амалисозии лоиҳаи «Таҳкими имконот баҳри коҳиши хатари офат ва иҷрои барномаи амалисозии Хиого дар Осиёи Марказӣ», ки аз ҷониби департаменти кӯмаки башардӯстонаи Иттиҳоди Аврупо «ДИПЕКО» маблағгузорӣ мегардад, ба роҳ монда мешавад. Дар доираи татбиқи ёддошт баргузории як қатор чорабиниҳо оид ба амалисозии консепсияи амният дар макотиб ва коҳиши хатари офатҳо дар соҳаи маориф пешбинӣ шудааст.

Оқои Нуралиев афзуд, мувофиқи қарордод, ба омӯзгорони макотиб тарзи амал ва расонидани кӯмаки фаннӣ дар ҳолатҳои фақулодда омӯзонида шуда, нашри дастурҳои иттилоотиву маърифатӣ ба нақша гирифта шудаанд.