Ба яке аз нуқтаҳои мубодилаи асъори шаҳри Душанбе ҳуҷуми мусаллаҳона анҷом дода шуд, ки бар асари он ду нафар ҷароҳат бардоштанд.

Тавре ба ОИ «Азия-Плюс» аз Вазорати корҳои дохилии ҷумҳурӣ иттилоъ доданд, шоми 24-уми октябр ду нафари ниқобпӯш ба нуқтаи мубдилаи асъори начандон дуртар аз бозори Шоҳмансур ворид шуда, бо таҳдид тавассути таппончаи Макаров кӯшиши ғорати нуқтаи мубодилаи асъорро кардаанд.

«Аммо соҳиби нуқтаи мубодилаи асъор Н.Н.-и 54-сола ва писарони ӯ ба онҳо муқобилат нишон додаанд, ки дар натиҷа яке аз писарон аз пои чап ва писари дигарӣ аз дасту қафаси сина ва сар ҷароҳат бардоштаанд», - гуфтанд дар вазорат.

Зикр гардид, ки писарони соҳиби нуқтаи мубодилаи асъор ба беморхона бистарӣ шуданд. Аз рӯйи ин далел парвандаи ҷиноӣ боз шуда, айни замон ҷиҳати ошкор сохтан ва боздошти ҷинояткорон чораҳои фавриву ҷустуҷӯйӣ андешида мешаванд.