Ин ҷавони 20-сола, ки моҳи сентябр бо гумони куштори бераҳмонаи духтари 19-сола, ки зоҳиран дӯстдоштааш будааст, дастгир шуда буд, бо қарори Додгоҳи вилояти Суғд 24 сол равонаи зиндон гардидааст.

Дар ин бора дафтари матбуоти Раёсати ВКД дар вилояти Суғд дар барномаи “Милитсия хабар медиҳад”  иттилоъ додааст.

Ин ниҳод гуфтааст, ки ҷавон сокини ноҳияи Зафаробод буда, барои "одкамкушӣ бо бераҳмии махсус" ё моддаи 104 қисми 2, банди “е” гунаҳкор дониста шуд.

Дар гузориш аз ҷавон Шаҳбоз Нуруллоев ном бурда шуда, зикр мешавад, ки  ӯ  “моҳи  сентябри имсол арусшавандааш Чарос Асророваи 19- соларо ба бо 16 зарби корд ба қатл расонида, барои руйпуш кардани ҷиноят ҷасади маҳрумро бо бензин оташ задааст”.

“Сабаби рух додани ҷинояти вазнини одамкушӣ ҷавоби хостгориро рад кардани ҳамсоядухтар мебошад, ки боиси адовату қасосгирии ҷавон гардидааст”, - зикр мешавад дар гузориш.

Назари худи гумонбар, наздикон ва вакили дифои ӯ дар робита ба қазия ва ҳамин тариқ, ба ҳукми додгоҳ маълум нест.

Куштори наздикон аз сӯи хешовандонашон ё дӯстдоштаҳо аз дасти якдигар ҳодисаи нав нест. Қаблан низ чунин ҳодисаҳо расонаӣ шуда буд. Аз ҷумла, моҳи августи солди равон пулиси Суғд аз марги як ҷавондухтари 21-сола, дар манзили иҷорааш аз дасти дӯстписари 17-солааш хабар дода буд.

Ба иттилои ин ниҳод, баъди “муноқишаи лафзӣ атрофи муносибатҳои маҳрамона”, ҷавон ба гулӯ ва шиками духтар 8 зарби корд зада, ба қатл расонидааст.

Тибқи иттилои Додситонии вилояти Суғд дар ним соли 2025-ум 10 ҷинояти одамкушӣ ба қайд гирифта шудааст. Дар тамоми Тоҷикистон дар ин давра 28 ҳолати одамкушӣ ва сӯйиқасд ба ҷон сабт шудааст.

Дар Telegram, Facebook ва Instagram бо мо бимонед.