Президенти Тоҷикистон Эмомалӣ Раҳмон охири ҳафтаи гузашта бо сафари расмӣ ба Шоҳигарии Ҳошимии Урдун раҳсипор гардида, дар ин сафар Сарвари давлатро вазири корҳои хориҷӣ, ёрдамчии Президенти ҶТ оид ба масъалаҳои робитаҳои хориҷӣ, вазирони рушди иқтисод ва савдо, маориф ва илм, молия, кишоварзӣ, фарҳанг, раиси Кумитаи давлатии сармоягузорӣ ва идораи амволи давлатӣ, раиси Палатаи савдо ва саноат ва дигар шахсони расмӣ ҳамроҳӣ карданд.

Бино ба иттилои хадамоти матбуоти сарвари давлат, дар фурудгоҳи байналмилалии ба номи Шоҳзода Алия Президенти Тоҷикистонро намояндагони воломақоми Шоҳигарии Ҳошимии Урдун самимона истиқбол гирифтанд.

Дар ҷараёни сафар Президенти Тоҷикистон бо Раиси шаҳри Аммон Юсуф Шаварбеҳ мулоқот карда, бо итминон иброз дошт, ки Тоҷикистон ва Урдун, бо такя ба алоқамандии амиқи таърихӣ, робитаҳои гуногунҷанбаи худро тавсеа бахшида, ҳамкориҳояшонро ба сатҳи сифатан нав хоҳанд баровард.

Сипас, Юсуф Шаварбеҳ саҳми арзанда ва талошҳои созандаи Эмомалӣ Раҳмонро дар роҳи барқарор кардани муносибатҳои дипломатӣ байни ду кишвар, таҳкими дӯстию бародарии мардумони Тоҷикистону Урдун таъкид дошта, дар вазъияти тантанавӣ ба Эмомалӣ Раҳмон Калиди рамзии тиллоии шаҳри Аммонро тақдим кард, ки ҳамин тавр Сарвари давлати Тоҷикистон соҳиби Унвони олии - Шаҳрванди фахрии шаҳри Аммони Шоҳигарии Ҳошимии Урдун гардид.

1/36

Рӯзи дуюми сафар Президенти Тоҷикистон бо Подшоҳи Шоҳигарии Ҳошимии Урдун Абдуллоҳи II ибни Ҳусейн дидору гуфтушунид карда, таъкид дошт, ки Тоҷикистон Урдунро ҳамчун давлати бонуфузи минтақаи Ховари Миёна ва ҷаҳони ислом эътироф мекунадин кишвар омода аст.

Баъди анҷоми мулоқоту музокироти сатҳи олӣ Эъломияи муштараки кишварҳо оид ба таҳкими ҳамкорӣ қабул шуда, дар бораи ҳавасмандгардонӣ ва ҳифзи мутақобилаи сармоягузорӣ, оид ба канорагирӣ аз андозбандии дукарата ва пешгирӣ намудани саркашӣ аз супоридани андозҳо аз даромад ва сармоя ва ҳамкорӣ дар соҳаи таҳсилоти олӣ ва таҳқиқоти илмӣ созишномаҳо ба имзо расиданд.

Худи ҳамин рӯз Эмомалӣ Раҳмон бо сарвазири Шоҳигарии Ҳошимии Урдун Ҳонӣ Фавзӣ ал-Мулкӣ мулоқот карда, таъкид дошт, ки Тоҷикистон ва Урдун баҳри тавсеаи ҳамкорӣ ва ба сатҳи баландтар баровардани онҳо имконоти фаровон доранд ва Тоҷикистон омода аст, бо дарназардошти манфиатҳои миллии ду кишвари дӯст, тамоми воситаҳоро ҷиҳати таҳкими ҳамкориҳоямон истифода барад.

Баъди анҷоми мулоқот оид ба бекор кардани раводид барои дорандагони шиносномаи дипломатӣ, ҳамкории иқтисодӣ, тиҷоратӣ, илмӣ ва техникӣ, ҳамкорӣ дар соҳаи кишоварзӣ, дар соҳаи фарҳанг ва санъат ва дар соҳаи сайёҳӣ созишномаҳои ҳамкорӣ ба имзо расиданд.

Байни Вазорати корҳои хориҷии Тоҷикистон ва Вазорати корҳои хориҷӣ ва муҳоҷирати Урдун Ёддошти тафоҳум дар бораи машваратҳои дуҷонибаи сиёсӣ, ҳамчунин байни Палатаи савдо ва саноати кишварҳо сзишномаи ҳамкорӣ ва созишнома оид ба таъсис додани Шӯрои соҳибкорони Тоҷикистону Урдун ба тасвиб расиданд.