Масъуд Пизишкиён, раисҷумҳури Эрон нимаи дуюми моҳи январ бори нахуст бо як сафари давлатӣ ба Тоҷикистон меояд ва бо Эмомалӣ Раҳмон, президенти Тоҷикистон мулоқот мекунад. Дар ин бора як манбаъ аз Вазорати корҳои хориҷии Тоҷикистон ба "Азия-Плюс" иттилоъ дод.

Тибқи иттилои манбаъ, дар доираи ин сафар ба ғайр аз мулоқоти роҳбарони ду кишвар, инчунин, дигар вохӯриву гуфтугӯҳо ва имзои чанд санади мухталиф дар назар аст.

Ба иттилои дастрас, дар доираи ин сафар як ҳайати баландпоя иборат аз соҳибкорону тоҷирони эронӣ низ ба Душанбе меоянд ва бо ҳамтоёни тоҷики худ масъалаи ҳамкориро баррасӣ мекунанд.

“Дар доираи сафари раисҷумҳури Эрон ба Тоҷикистон ҳамзамон 15-16 январи соли равон як ҳайати бузурги тоҷирони эронӣ, бо роҳбарии раиси утоқи бозаргонӣ, саноеъ, маодину кишоварзии Эрон вориди шаҳри Душанбе мешаванд”, - навиштааст сомонаи Утоқи бозаргонӣ, саноеъ, маодину кишоварзии Эрон.

Ба иттилои манбаъ, барномаҳои пешбинишуда шомили баргузории ҳамоиш ва нишастҳои тиҷорӣ дар сатҳи B2B бо ҳузури ширкатҳо ва мақомоти Тоҷикистон, боздид аз марокизи тиҷорӣ ва санъатӣ, баргузории нишаст дар сифорати Эрон хоҳад буд.

Ҳамчунин, хабаргузории “ИСНА” навиштааст, ки як ҳайати баландпояи иборат аз табибони эронӣ низ дар доираи ин сафар ба Тоҷикистон меоянд ва бо ҳамтоҳои мубодилаи афкор мекунанд.

Масъуди Пизишкиён
Акс аз AFP

 

Аз таъсиси мактаби “Рӯдакӣ” то афзоиши парвозҳои мустақим

Гуфтан ба маврид аст, ки чанде пеш Низомиддин Зоҳидӣ, сафири Тоҷикистон дар Эрон мулоқот бо ду мансабдори баландпояи Эрон масъалаи бунёди мактаби муштарак миёни Тоҷикистону Эрон - мактаби байналмилалии “Рӯдакӣ” дар Душанберо баррасӣ карда буд.

Ба гуфтаи сафири Тоҷикистон дар Эрон, сохтмон ва фаъолияти мактаби “Рӯдакӣ” ҳоло дар се самт - моликият, мӯҳтавои китобҳои дарсӣ ва мудирият бо мушкилоте рӯбарӯ аст. Аз ин рӯ Низомиддин Зоҳидӣ барои ҳалли ин мушкил аз  Алиризо Козимӣ, Вазири омӯзиш ва парвариши Эрон хостааст, ин масъалаҳо ҳаллу фасл шаванд ва ин мактаб ҳарчи зудтар кушода шавад.

Ҳамзамон интизор меравад, ки Кумитаи муштараки ҳамкорӣ миёни Тоҷикистону Эрон таъсис дода шавад. Дар ин робита ҳам сафири Тоҷикистон дар Эрон бо Ризо Солеҳии Амирӣ, вазири мероси фарҳангӣ, гардишгарӣ ва саноеи дастии Эрон гуфтугӯ карда буд.

Ғайр аз ин, пешбинӣ мешавад, ки миёни шаҳрҳои Душанбе ва Шероз парвозҳои мустақим роҳандозӣ шавад. Ҳоло аз Душанбе ба Теҳрон ва Машҳад парвозҳои мустақим ҳаст.

Пешниҳоди дигар ин аст, ки Тоҷикистону Эрон дар мавзӯи ёдгориҳои таърихиву фарҳангии ду кишвар филми муштараке бо чанд забон ба навор мегиранд.

Мулоқоти Эмомалӣ Раҳмон ва Масъуди Пизишкиён. 30 июли соли 2024. Теҳрон
аз сомонаи Хадамоти матбуоти раисҷумҳури Тоҷикистон.

Ҳоло дақиқ маълум нест, ки ин масъалаҳо дар гуфтугӯи Эмомалӣ Раҳмон ва Масъуд Пизишкиён баррасӣ мешавад ё не. Вале маълум аст, ки ин сафар дар равобита ояндаи ду кишвар як саҳифаи навро боз мекунад.

 

Роҳи пурпечутоби муносибатҳои ду кишвар

Бояд гуфт, ки пас аз даргузашти раисҷумҳури пешини Эрон Иброҳим Раисӣ, моҳи июли соли 2024 Масъуд Пизишкиён раисҷумҳури Эрон интихоб шуд.

Дар маросими савгандёдкунии ӯ Эмомалӣ Раҳмон ширкат варзид ва Масъуди Пизишкиён аз густариши ҳамкориҳо бо Тоҷикистон сухан карда, изҳор дошта буд, ки бояд талош намоем, марзҳои сиёсиро камранг ва муносибатҳоро пурранг кунем.

Онҳо бори дуввум дар ҳошияи иҷлосияи Маҷмаи Умумии СММ дар шаҳри Ню-Йорки Амрико бо ҳам вохӯрданд ва масъалаҳои амниятиву иқтисодӣ ва илмиву фарҳанги миёни ду кишвар, ҳамчунин, мавзуи кӯмак ба Афғонистонро баррасӣ кардаанд.

Пизишкиён ҳамчун раисҷумҳури Эрон бори нахуст ба Тоҷикистон меояд.

Ёдовар мешавем, ки баъди чандин соли сарди миёни ду кишвар, бо ба сари қудрат омадани Иброҳим Раисӣ, раисҷумҳури пешини Эрон дар моҳи августи соли 2021 гарм шудани равобит оғоз шуд. Дар соли 2021 гардиши мол то 120 миллион доллар афзоиш ёфта, дар соли 2022 сармоягузории Эрон ба иқтисоди Тоҷикистон ҳудуди 33 миллион долларро ташкил дод.

Моҳи ноябри соли 2023 зимни сафари Раисӣ ба Душанбе ёддошт дар бораи лағви низоми раводид миёни Тоҷикистон ва Эрон ба имзо расид. Он аз 10 августи соли равон эътибор пайдо кард. Ҳамакнун шаҳрвандони ду кишвар метавонанд то 30 рӯз бидуни дарёфти раводид ба давлатҳои ҳамдигар сафар кунанд.

Дар Telegram, Facebook ва Instagram бо мо бимонед.