Палатаи поёнии парлумони Тоҷикистон фраксияҳои се ҳизб ва як гурӯҳи вакилони ғайриҳизбиро ба қайд гирифт.

Дар ҷаласаи навбатии имрӯзаи Маҷлиси намояндагони Маҷлиси Олии Тоҷикистон дар ин бора қарорҳои дахлдор қабул шуданд.

Аз ҷумла, фраксияи Ҳизби ҳокими халқии демократии Тоҷикистон иборат аз 42 нафар вакилон, фраксияи Ҳизби аграрии Тоҷикистон бо 7 нафар вакилон ва фраксияи Ҳизби ислоҳоти иқтисодии Тоҷикистон иборат аз 5 нафар вакилон ба қайд гирифта шуд.

Ғайр аз ин, як гурӯҳи вакилони ғайриҳизбӣ иборат аз 5 нафар вакилон низ сабт шуд.

Ёдрас мекунем, ки маъракаи интихоботи вакилон ба Маҷлиси намояндагони Маҷлиси Олии Тоҷикистон рӯзи 1 марти соли равон баргузор шуд.

Аз 63 курсии вакилӣ дар палатаи поёнии парлумон 47-тоаш насиби Ҳизби халқии демократии Тоҷикистон шуд.

Ҳамчунин 7 номзади Ҳизби аграрӣ, 5 намояндаи Ҳизби ислоҳоти иқтисодӣ, 2 узви Ҳизби коммунист, 1-тогӣ намояндагони Ҳизби демократ ва Ҳизби сотсиалистии Тоҷикистон низ вакили парлумон интихоб шуданд.

Мувофиқи қонунгузории ҷумҳурӣ, барои таъсиси фраксия ҳизб дар палатаи поёнии парлумон бояд на камтар аз 5 намоянда дошта бошад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.

Дар TelegramFacebookInstagramViberЯндекс.ДзенOK ва Google Новости бо мо бимонед.