Роҳи автомобилгард, ки шаҳри Исфараро бо ҷазирақаламрави тоҷикистонии Ворух мепайвандаду рӯзи шанбе аз ҷониби Қирғизистон баста шуда буд, субҳи имрӯз барои равуои воситаҳои нақлиёт ва одамон боз шуд. Дар ин бора ба ОИ «Азия-Плюс» сокинони ҷамоати Ворухи шаҳри Исфара хабар доданд.

Ба қавли онҳо,  пас аз муноқиша миёни марзбонони ду кишвар, ки нимаи рӯзи 11-уми январ дар мавзеи деҳаи Хоҷӣ Ало рух дод, айни замон дар маҳаллаҳои ахолинишини наздимарзӣ вазъи орому амн ҳукмфармо аст.

«Дар гуфтушуниди намояндагони сохторҳои қудратӣ ва мақомоти маҳаллии ҳарду кишвар оид ба масъалаи кушодани роҳ ба Ворух мувофиқа ҳосил шуд», - гуфт манбаъ.

Ёдрас мекунем, ки рӯзи 11-уми январ дар мавзеи деҳаи Хоҷаи Аълои ноҳияи Исфара ва Оқсойи вилояти Бодканд миёни марзбонони тоҷику қирғиз муноқиша ба вуқӯъ пайваста, бо тирпарронӣ ба анҷом пазируфт, ки бар асари он 3 сарбози тоҷик, 5 марзбони қирғиз ва як милисаи қирғиз ҷароҳат бардоштанд.