Қарори ба шикори гургҳо сафарбар кардани воҳиди баргузидаи дастаи таъиноти махсус аз ҷониби мақомоти иҷроияи ҳокимияти давлатии Вилояти Мухтори Кӯҳистони Бадахшон ва ситоди байниидоравӣ оид ба таъмини тартиботи ҳуқуқӣ дар вилоят қабул шудааст.

Тавре хадамоти матбуоти раиси ВМКБ хабар медиҳад, як гурӯҳи ҷангиёни дастаи таъиноти махсуси “Алфа”-и КДАМ Тоҷикистон бо силоҳи махсуси шикорӣ ва дигар асбобу лавозимоти зарурӣ таъмин карда шудаанд.

Ҷангиён барои нобуд кардани гургҳо дар қаламрави ҷамоатҳои Поршинев, Сучон, Навобод, Вер, Ванқалъа, Ғарибшо Шаҳбозови ноҳияи Шуғнон, Тусиён, Роштқалъа, Қурбоншо Гадолӣ, Тавдеми ноҳияи Роштқалъа ва Пастхуф, Рӯшон, Назаршо Додихудоев, Абдулвосеъи ноҳияи Рӯшон сафарбар шудаанд.

Бино ба маълумоти дастгоҳи раиси вилоят, дар як қатор ҷамоатҳои ВМКБ шумори гургҳо хеле зиёд шуда, онҳо ба амнияту саломатии аҳолӣ хатар эҷод мекунанд. Соли 2018 гургҳо ду сокини ҷамоати Поршиневи ноҳияи Шуғнонро кушта буданд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.

Дар TelegramFacebookInstagramViberЯндекс.ДзенOK ва Google Новости бо мо бимонед.