Раиси Шӯрои уламои Тоҷикистон Саидмукаррам Абдуқодирзода иттилооти як қатор расонаҳои хабариро дар бораи он ки ӯ гӯё аз мусулмонони Тоҷикистон даъват ба амал овардааст, ки ҷашни Соли нави милодиро таҷлил накунанд, рад месозад.

Дар робита ба ин масъала Абдуқодирзода дар сӯҳбат бо хабарнигори ОИ «Азия-Плюс» изҳор кард, ки ӯ дар посух ба саволи хабарнигори хадамоти тоҷикии Би-Би-Сӣ, ки пурсидааст: «Шумо баргузории маросими Ошӯроро манъ кардед, пас чаро таҷлили ҷашни Соли навро маҳкум намекунед?», посух додааст, ки «Ошӯро маросими динӣ аст, вале Соли нав иди дунявист. Ин ҷашни исломӣ нест ва дар Қуръон дар ин хусус чизе гуфта нашудааст. Аммо суханони маро ба дигар маънӣ пешниҳод карданд».

Ёдрас мекунем, ки дар арафаи фарорасии Соли нави милодӣ хадамоти русии хабаргузории Би-Би-Сӣ иттилоъ дода буд, ки Абдуқодирзода аз мусулмонони Тоҷикистон даъват ба амал овард, ки аз таҷлили ҷашни Соли нави милодӣ худдорӣ варзанд, зеро он мухолифи рукнҳои исломӣ буда, ба расму оини тоҷикон мутобиқат намекунад.

Аммо таваҷҷуҳи зиёд ба суханони муфтӣ пас аз қатли Парвиз Давлатбекови 24-сола дар пойтахт, ки сарулибоси Бобои барфӣ дар бар дошт, пайдо шуд. Чанде сурат гирифтани ин амалро ба ҷанбаи мазҳабӣ нисбат доданд, вале мақомоти расмӣ, аз ҷумла ВКД ин андешаро ғайривоқеӣ арзёбӣ карда, изҳор карданд, ки ҷинояти мазкур дар натиҷаи як ҷанҷоли маъмулӣ содир гардида, ҷавонони ҷинояткор дар ҳолат мастӣ қарор доштанд.

Дар мавриди шарҳи масъалаи мазкур С.Абдуқодирзода гуфт, ҳеҷ инсоне бо сарулибоси дгар ба бар кардан «кофир» намешавад. «Қатли инсон гуноҳи бузург ва нобахшиданӣ аст. Оллоҳ то он замоне, ки гунаҳкор тамоми азобҳои расонида ба дигар касро худ эҳсос накунад, ҳеҷ гоҳ қотилонро нахоҳад бахшид», - мегӯяд раиси Шӯрои уламо.

«Ман ин амалро дар ҳама гуна ҳолат маҳкум менамоям, мусулмонони ҳақиқӣ ҳеҷ гоҳ ба чунин амал даст намезанад», - афзуд муфтӣ.