Мутобиқи озмуни эълоннамудаи Агентии сохтмон ва меъмории назди ҳукумати ҶТ оид ба беҳбуди симои маркази пойтахти Тоҷикистон, кӯчонидани бинои ҳозираи Почтаи марказӣ ва толори кинову консерти «Кохи Ҷомӣ», студияи телевизиони «Сафина» ва бинои Вазорати кишоварзии ҷумҳурӣ дар назар аст.

Тавре ба ОИ «Азия-Плюс» як манбаи огаҳ аз Агентии мазкур хабар дод, аз озмун моҳи марти соли равон, дар остонаи таҷлили ҷашни Наврӯз натиҷагирӣ карда мешавад.

«Мувофиқи шартҳои озмун, дар ҷойи бинои Почтаи марказӣ сохтмони бинои нави Хадамоти алоқаи назди ҳукумати ҶТ, дар ҷойи бинои «Кохи Ҷомӣ» сохтмони бинои нави Вазорати фарҳанги ҷумҳурӣ, дар ҷойи бинои телевизиони «Сафина» бунёди бинои маъмурии Кумитаи телевизиону радио ва дар макони бинои Вазорати кишоварзӣ сохтмони бинои нави вазорати мазкур пешбинӣ шудааст», - гуфт манбаъ.

Бино ба иттилои манбаъ, айни замон ба озмуни мазкур танҳо як дархости лоиҳавӣ пешниҳод гардидааст.