Кормандони шуъбачаи сайёҳии милитсияи Шӯъбаи милитсия оид ба масъалаҳои экологии Вазорати корҳои дохилӣ охири ҳафтаи гузашта дар фурудгоҳи байналмилалӣ як гурӯҳ шаҳрвандони хориҷиро, ки аз давлати Бразилия бо мақсади сайёҳӣ ба Ҷумҳурии Тоҷикистон ташриф оварданд, бо нону намак пазироӣ намуда, ба онҳо варақаҳои иттилоотӣ тақсим карданд.
Дар маълумоти Вазорати корҳои дохилии ҷумҳурӣ қайд мешавад, ки дар варақаҳои иттилоотӣ, ки аз ҷониби шуъбачаи сайёҳии милитсия таҳия гардидаанд, маводҳои зиёди иттилоотӣ, аз қабилӣ маълумот дар бораи хизматрасонии милитсияи сайёҳӣ, ширкатҳои суғурта, симкортҳо барои сайёҳон, ширкатҳои таксӣ, фурудгоҳҳо, телефони боварӣ ва ғайра мавҷуд мебошанд.
Гуфта мешавад, ба сайёҳони хориҷӣ ширкати сайёҳии «Орион-одвентур» хизмат расонида, кормандони шуъбачаи сайёҳии милитсия онҳоро ҳамроҳӣ менамоянд.
Сайёҳони хориҷӣ аз пазироии гарму самимии тоҷикона хеле хушҳол гардида, изҳор доштанд, ки тайи се рӯз аз шаҳри зебою дилорои Душанбе дидан намуда, сипас ба дигар шаҳру вилоятҳои ҷумҳурӣ сафар менамоянд.
Зимнан зикр мегардад, ки дар натиҷаи тадбирҳои андешидаи ҳукумати мамлакат ва истифодаи самараноки имкониятҳои сайёҳӣ дар чор моҳи соли равон 325 ҳазор нафар сайёҳон ба Ҷумҳурии Тоҷикистон ташриф овардаанд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
Руcский