Шумори расмии сироятшудагони коронавируси нав ба 6053 нафар расид. Дар ин бора South China Morning Post бо истинод ба маълумоти мақомоти тиббии Чин хабар медиҳад.

Тавре хабаргузории РБК иттилоъ медиҳад, ин рақам нисбат ба шумори касоне, ки соли 2003 дар Чин ба бемории илтиҳоби шуши ғайримаъмулӣ гирифтор шуда буданд, зиёдтар аст. Он замон тӯли нуҳ моҳ ҳамагӣ 5327 нафар ба ин беморӣ мубтало гардиданд.

17 сол пеш бар асари сироятёбӣ аз вируси SARS 349 нафар ҳалок шуданд. Феълан шумори умумии фавтидагон ба 132 нафар расида, мутахассисон аз эҳтимол дур намедонанад, ки ин рақами ниҳоӣ нест.

Зикр мешавад, ки дар берун аз ҳудуди Хубэй дар Чин 6 нафар фавтидаанд. Ҳукумати Чин тасдиқ кардааст, ки аксари ин фавтидагон шахсони пиронсол буда, бо вазъи солимиашон мушкилӣ доштанд.

Табибони Чин бовар доранд, ки муддати 10 рӯзи наздик вирус ба авҷи хуруҷи худ расида, сипас вазъ ба эътидол меояд. Ба ақидаи мутахассисони донишгоҳи Ҳонконг, шумори беморон дар шаҳрҳои бузурги Чин моҳҳои апрел-май ба ҳадди ниҳоӣ мерасад.

Ба ғайр аз Чин, ҳолатҳои сироят ба ин вирус, ки аз як шахс ба шахси дигар мегузарад, дар ИМА, Фаронса, Олмон, Австралия, Ҷопон ва Кореяи Ҷанубӣ низ ба қайд гирифта шудааст.

Бемор ба гумони сироятёбии вируси 2019-nCoV ҳамчунин дар Тибети Чин муайян шуда, агар ташхис тасдиқ шавад, ин маънои онро хоҳад дошт, ки коронавирус дар тамоми субъектҳои Чин паҳн шудааст.

Хуруҷи коронавирус нахуст моҳи декабри соли гузашта дар шаҳри Ухани Чин ба қайд гирифта шуд. Дар натиҷаи  паҳншавии беморӣ, дар Ухан ва боз якчанд шаҳрҳои вилояти Хубэй карантин эълон шуд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.