Сафорати Британияи Кабир дар Тоҷикистон хабар медиҳад, ки ахиран ҳодисаҳои пешниҳодҳои қалбакии таъмин бо кор дар соҳаи кишоварзии ин кишвар зиёд шудааст.
Дар саҳифаи худ дар Facebook сафорат шаҳрвандонро огоҳ мекунад, ки ба ин гуна эълонҳои қалбакӣ бовар накунанд. Аз ҷумла, қалбакӣ будани даъватро метавон аз он фаҳмид, ки дар он дар бораи гирифтани раводид (виза) дар сафорат сухан меравад.
“Сафорати Британияи Кабир дар Душанбе раводид умуман намедиҳад. Агар ба шумо гӯянд, ки шумо метавонед раводидро аз Сафорат гиред, он гоҳ ширкате, ки шумо бо он сарукор доред, ҳақиқӣ нест! Хоҳишмандон нахуст бояд ба Марказҳои машварат ва омодакунии муҳоҷирони кории Хадамоти муҳоҷирати Тоҷикистон ва сипас ба маркази раводиди Британияи Кабир TLScontact муроҷиат намоянд, ки дар он барои раводид боҷи расмӣ пардохт мешавад”, - омадааст дар хабар.
Агар оид ба барномаи кори мавсимӣ дар Британияи Кабир савол дошта бошед, лутфан ба телефони боварӣ занг занед: 225 05 75; 225 02 21.
Сомонаи расмӣ барои пур кардани дархости (анкетаи) раводиди Британиявӣ: https://www.gov.uk/seasonal-worker-visa/apply.
Сомонаи расмии ширкати TLS (ширкате ки ҳуҷҷатҳои шуморо қабул мекунад): https://pos.tlscontact.com/dyu_ru/address.
Ёдрас мекунем, ки соли гузашта бори нахуст аз Тоҷикистон ба Британияи Кабир як гурӯҳи иборат аз 126 нафар ба кор фиристода шуданд. Баъдтар боз 200 нафар муҳоҷирони корӣ ба онҳо ҳамроҳ шуданд.
Шаҳрвандони Тоҷикистон асосан ба корҳои мавсимӣ дар саҳроҳои кушод ва гармхонаҳо машғул шуда, ҳосили буттамевагиҳо (клубника ва ғайра) ва дигар сабзавоту меваҳоро ҷамъоварӣ мекунанд.
Ҳамчунин зикр гардида буд, ки арзиши сафар ба Британияи Кабир аз ҷониби худи хоҳишмандон пардохт шуда, барои ин ба онҳо аз 1 то 1,5 ҳазор доллар лозим аст. Ҳамчунин аз хоҳишмандон донистани забони англисӣ дар сатҳи муошират талаб мешуд.
Муҳлати шартномаи меҳнатӣ ҳамагӣ 6 моҳро ташкил медиҳад ва пас аз ним соли кор муҳоҷири тоҷик бояд ба хонааш баргардад.
Руcский