Ҷамила Содот Аламулҳудо, ҳамсари раисҷумҳури Эрон Иброҳим Раисӣ, ки шавҳарашро дар сафари расмӣ ба Тоҷикистон ҳамроҳӣ мекард, дирӯз, 8-уми ноябр, ба дидани Донишгоҳи миллӣ, Донишгоҳи давлатии тиббӣ ва мактаб-интернати №1 рафтааст.

Тавре сомонаи Донишгоҳи миллии Тоҷикистон (ДМТ) иттилоъ медиҳад, Ҷамила Содот дар ин донишгоҳ бо устодону донишҷӯён мулоқот карда, дар бораи рушди муносибатҳои дӯстонаи Эрон бо Тоҷикистон ва омӯзишу таҳқиқ сухан гуфтааст.

Ҳамчунин, дар ин мулоқот китоби Ҷамила Содот Аламулҳудо “Санъати зиндагии занон” рӯнамоӣ шудааст. Китоби мазкур тозанаш буда, дар он нақши занон дар ҷомеа таҳлил гаштааст.

Ҳамсари раисҷумҳури Эрон инчунин ба Донишгоҳи давлатии тиббии Тоҷикистон ба номи Абӯалӣ ибни Сино (ДДТТ) рафта, бо донишҷӯёни ин донишгоҳ низ вохӯрӣ гузаронидааст.

“Хонум Ҷамила Содот Аламулҳудо бо фаъолияти донишгоҳ, аз ҷумла корҳои амалӣ, ҷараёни гузаронидани ҷарроҳӣ, намоиши китобҳои муштарак шинос шуд”, - менависад хабаргузории “Ховар”.

Ҳамчунин, Ҷамила Содот Аламулҳудо бо  тарбиятгирандагони мактаб-интернати №1 барои кӯдакони ятим ва бепарастори шаҳри Душанбе вохӯрӣ кардааст.

Мактаб-интернати №1 яке аз калонтарин муассисаҳои таълимии ҷумҳурӣ ба шумор рафта, аз рӯйи иқтидори ғунҷоиш барои 550 нафар тарбиятгирандагон пешбинӣ гардидааст.

Боздиди Ҷамила Содот Аламулҳудо аз мактаб-интернати №1-и шаҳри Душанбе
Акс аз АМИТ "Ховар"

Ҷамила Содот Аламулҳудо кист?

Бояд гуфт, ки Ҷамила Содот Аламулҳудо нависанда, пажӯҳишгар ва устоди ду донишгоҳи Эрон аст ва доктори илмҳои фалсафа мебошад. Ӯ аз камтарин бонувони аввали Эрон дониста мешавад, ки дар сафари расмӣ раиси ҷумҳури Эронро ҳамроҳӣ карда, аз муассисаҳои омӯзишии кишвар дидан кардааст.

Ҷамила Содоти Аламулҳодӣ соли 1975 дар оилаи рӯҳонии маъруф ва имоми масҷиди ҷомеи Машҳад Сайид Аҳмад Аламулҳудо ба дунё омадааст. Дар 18-солагӣ ӯ бо Иброҳими Раисӣ иҷдивоҷ карда, модари ду фарзанд - Райҳон ва Марям мебошад.

Баъдан чун нависанда, пажӯҳишгар ва устоди донишгоҳ маъруф шуд.

Ҷамила Содот дар соли 2013 дар Донишгоҳи тарбиати мадрис унвони доктори фалсафаи маорифро гирифтааст. Ҳамон сол ӯ Пажӯҳишгоҳи бунёдии илм ва фанноварии Донишгоҳи Шаҳиди Биҳиштиро таъсис дод ва то ба ҳол раҳбари он аст.

Ӯ дар факултети илмҳои таълимӣ ва равоншиносии Донишгоҳи Шаҳиди Биҳиштӣ дарс мегӯяд. Инчунин, дар курси докторантураи Донишгоҳи Шаҳиди Биҳиштӣ аз фанҳои фалсафаи таҳсилоти олӣ, антропология дар ислом, усулҳои таълим, асосҳои назариявии идоракунии маориф, мактабҳои фалсафӣ ва андешаҳои таълимӣ дарс медиҳад.

Суханронии Ҷамила Содот Аламулҳудо дар ДМТ

Аз моҳи марти соли 2018 дабири Шӯрои таҳаввул ва навсозии низоми маориф мебошад.

Ёдовар мешавем, ки дирӯз раисҷумҳури Эрон Иброҳим Раисӣ ба Тоҷикистон омада, бо расиҷумҳури Тоҷикистон Эмомалӣ Раҳмон мулоқот кард. Дар доираи ин сафар миёни Тоҷикистон ва Эрон дар маҷмӯъ 19 ёддошти тафоҳуми ҳамкорӣ имзо гардид.

Дар Telegram, Facebook, Instagram, OK ва ВК бо мо бимонед.